يعني ايه E-Commerce ؟

تعالى بقا ندخل في الموضوع على طول

الفتـرة اللي فاتت 90% من الناس كـانت بتتكلم عن الـE-Commerce وازاي هو بينمو بطريقة كبيرة جدا والفكرة بدأت ازاي وامازون وعلي اكسبريس والخ

– طب يعني ايه بقا E-Commerce …؟
” عمليه بيع وشراء بين تاجر ومستهلك بس اونلاين بإستخدام الوسائل الألكترونية المتاحة “

– ايه الفـرق بين التجارة الألكترونية والـتجارة اوفلاين ؟
نفس اللي بنشوفه في التجارة الأوفلاين بنشوفه في الأونلاين بس بشكل مختلف شوية مع تثبيت شوية عوامل زي ” البايع – الشاري – المنتج “

– ايه المميز في التجارة الألكترونية ؟
متواجد في كل مكــان ” بمعنى ان اي حد ممكن يشوف الأستور بتاعك من اي مكان في العالم ويعرف انت بتبيع ايه والمنتج بتاعك ومواصفاته والخ ولو عندك شحن دولي وبتوصل في كل مكان ف هتلاقي كمان طلبات من اي حته في العالم
مفتوح 24 ساعة مش زي المحلات ليها وقت بتفتح فيه كل يوم وتقفل وتنتهي العمليه في البيع والشراء بأنك قفلت المحل وبس
هيوفر عليك تكاليف كتير زي الأيجارات والمياه والكهرباء والخ..
هتقدر توصل المنتج بتاعك للناس اللي محتاجاه بالظبط وتبقا عارف هما قد ايه وموجودين فين..

– هل الـتجارة الألكترونية صعبه ؟
صعبه او سهله دي مرتبطة بيك انت وبشغلك وازاي هتقدر تكبر الشغل اللي انت فيه وتزود مبيعاتك وتعتمد على دخل المشروع في انك تكون بتكسب وفاهم كل حاجة ماشية ازاي مش بادئ ومستني تكسب او تخسر وسايبها كدا زي ما تيجي تيجي

– ليه في محلات بدأت تبيع اونلاين وتتجه للتجارة الألكترونية ؟
الفتـرة دي في العموم لو ملكش تواجد اونلاين ف اعرف انك شبه مش موجود أغلب الأوقات لما حد بيدور على اي حاجة بيروح يعمل سيرش عليها ويعرف الأماكن اللي بتبيعها وانهو الأفضل ويبدأ يقارن الأفضل ايه وسواء هيشتري اونلاين او هينزل المحل يطلب المنتج ف هو عرف ان عندك المنتج من تواجدك انت اونلاين
غير كدا اغلب الناس اللي فاتحة محلات بقت شايفة ان توجهه الناس انها تشتري اونلاين اكبر بكتير ف بدأت تخش تنافس في الموضوع ده ولو بشكل بسيط

البوست ده صغير وخفيف كـبداية للناس اللي حابه تتعلم او تعرف يعني ايه تجارة الكترونية بشكل مبسط وبعض الأسئلة اللي بتتداول بين الناس وبس