غير مصنف

وبعدين بقا Audit, Audit, Audit يمكن من اكتر الكلمات اللي بقينا نسمعها كتير الفترة اللي فاتت هي الكلمة دي وده خلى ناس كتير اوي عارفة معناها بس مش عارفة تعمل ايه برضوا وخليني ابسطلك الموضوع خالص وأقولك ان الـ Audit معناه التدقيق والمراجعة وفي المجال عندنا التدقيق والمراجعه ده بنبدأه من اول مكالمة مع العميل بتاعنا طـيب الهدف من الـ Audit حاجات كتير اوي ولكـن أهمها انك كـ واحد شغال في الـ Performance تكـون فاهم اللي انت داخل عليه وعارف المشاكل فين بالظبط عشـان تقدر تعرضها وتعرض الحلول بتاعتها وانهاردة هاخدك في رحلة خفيفة سريعة نتكلم فيها سوا انا بعمل الموضوع ده ازاي من الأساس ونقول بسم الله البداية : Brain Dump يمكن دي من اكتر المراحل اللي بحبها في الـ Audit واللي فيها بطلع كل الأفكار اللي في دماغي وكل المشاكل من غير ما ارتبها خليني اقولك سريعا يعني ايه Brain Dump هو اسلوب بيستخدم ل ترتيب الأفكار عن طريق التفريغ وبيساعد جدا في حل المشاكل وأول جزء في الـ Brain Dump هو انك تكتب من غير م توقف… تكتب كل حاجة في دماغك كل افكارك العشوائية من غير ترتيب او تحليل وأوعى تحكم على أفكارك دي او تعيد صياغتها او تنظمها كل اللي عليك انك تحطها بس وبعد كدا بقا بنبدأ نصنف الأفكار دي حاجات محتاجة تتعمل دلوقتي – حاجات ممكن نصبر عليها – حاجات هتزود معانا النتايج بسرعه – حاجات لازم تتعدل حالا والخ.. وبعد م تخلص كل ده بتختار اسهل حاجة تقدر تبدأ بيها…. يبقـا كدا اول حاجة بنبدأ بيها اننا نرمي كل حاجة عنينا شيفاها من اللحظة الأولى في فايل من غير م نفكر طب الحاجات ي قنديل اللي انت بتفكر فيها في اللحظة الأولى هي ايه ؟ شكل الموقع – الـ Product Pages – الصور – وصف المنتج – الـ Offers – الـ Funnel – صفحات السوشيال ميديا – الـ Comments – الـ Reviews – الموقع بيدي ثقة ولا لأ للعميل – في هوية ولا الدنيا ماشية بوستات تفاعليه شقيه – الـ Order Process عامله ازاي ببدأ أجمع كل الـ observations دي بشكل عشوائي… ما بنظمش ولا برتب. بس براقب… وبسجل كل حاجة. وبعد ما أخلص، بيبقى عندي انطباع أوّلي حقيقي عن البزنس. مش مجرد رأي فني، رؤية كاملة للمشروع كـ “منظومة” خلاص كدا كـل حاجة بقت واضحة وبقيت فاهم المنظومة دي كلها شغاله ازاي.. ندخل في الجزء اللي بعده المرحله التانية : التجربة الشـاملة وهنا انا سميتها بالتجربة الشاملة عشان دي المرحلة اللي ببدأ اتيست فيها كل حاجة فعليا كل حاجة شغاله ببدأ اجربها وبنقلها عن طريق Checklist فيها كل حاجة ممكن احتاجها الـ Checklist بتبدأ بالـ General Assets واللي فيها كل حاجة ليها علاقة بالـ Home Page, Search bar, CTA’s, وغيرها… وحاجات تانية ليها علاقة بكـل صفحة جوا الموقع زي الـ Product Page, Privacy, Thankyou page, checkout page, Cart وحتى الـ Search Bar طيب خلصت الجزء الخاص بالمـوقع تعالى نعمل Checklist تانية نتكلم فيها عن المنتج ونشوف المنتج ده سعره كام والعرض بتاعه عامل ازاي والصور والفيديوهات بتاعته مقبولة ولا لأ ومن هنـا ندخل في اهم جزء وهو الســوق اصلا اللي فيه البيزنس بتاعي ويمكـن انت ممكن تشوفها خطوة متأخرة لكـن انا دايما بحاول اعملها بعد ما افضي كل اللي في دماغي وابدأ ابص بقا على السوق كله طيب تفتكر هبدأ ابص على السوق ازاي ! ببدأ ابص على السـوق من نحيه عدد المنافسين وده اول حاجة وحجمهم ويمكن حاجة من الحاجات اللي ناس كتير اوي مش بتكون بتتكلم فيها هي حجم المنافسين واختيارك ليهم هديلك مثال ابسطلك الدنيا لو فاكر انك هتبدأ بيزنس في الملابس دلوقتي وتحط ان المنافس بتاعك هو ZARA فـ اعرف انك كدا داخل غلط وبتحط المنافسين بتاعك غلط اختيارك للمنافسين بتاعك لازم يكون على اساس حجمك وحجمهم… نرجع للنقطة بتاعتنا هنختار 5 منافسين ونبدأ نعمل سيرش عليهم… طب هنعمل سيرش عن طريق ايه ؟ ممكن نستخدم ادوات زي Meta ads Library و TikTok Creative Center عشان تشوف الناس دي مشغله اعلانات ولا لأ ولو شغالين اعلانات شغالين على منتجات ايه بالظبط وبعد م تدور عليهم وتشوفهم شغالين على ايه تبدأ تشوف هل المنتجات اللي عندهم هي نفسها اللي عندك بالظبط ولا لأ ولو هي بالظبط فـ هل اسعارها نفس اسعارك ! وهل الصور اللي بيستخدموها والـ Media بشكل عام شبهك ولا في حاجة مختلفة وتبدأ تشوف المناسب ليك واللي مش مناسب من نحية الـ Media وهل الحاجات دي فعلا عامله نتايج ولا لأ.. وتبص على حاجات تانية زي BuiltWith عشان تقدر تحدد الويب سايت بتاعهم مبني على ايه وايه الـ Tools اللي بيستخدموها تانية انت تقدر تستخدمها وبعدين تبص على طريقة اعلاناتهم وبيستخدموا ايه بالظبط والـ Messaging شكلها عامل ازاي وبيوجهوا كلمهم لـ مين وبـكدا انت هتبدأ تكـون صورة كامله عن البيزنس بتاعك وعامل ازاي جنب باقي المنافسين اللي حواليه والموضوع ده هيوفر عليك وقت ومجهود كبير جدا في الشـغل ببساطة لأنك مش هتعيد اختراع العجله من جديد لأ انت قدامك ناس شغاله وبتحقق فعلا نتايج وانت بتحاول تشوف المشاكل وتحلها.. خلصنا كدا كل حاجة وصولا بالمنتج – المنافسين.. ندخل بقا في باقي الـ Cycle ونجربها برضوا…. الـ Cycle دي زي خدمة العملاء – الشحن – رسائل بعد البيع وغيرها.. أنا حرفيًا براجع الرحلة كلها من أول ما العميل يشوف إعلان… لغاية ما يسمع جرس الباب، ويستلم المنتج. أنا ما ببصش بس على اللي موجود. أنا كمان بسجّل كل اللي مش موجود. كل فجوة، كل فرصة ضايعة، كل حاجة ناقصة أو متعملتش أصلاً. وفي ورقة تانية، بكتب: المشاكل الرئيسية اللي أنا شايفها حلول مبدأية ممكن نبدأ نشتغل عليها أولويات التنفيذ لأن أي محاولة لصرف فلوس في Ads من غير الخطوات دي… بتبقى محاولة إنقاذ في بحر أنت مش شايف أعماقه. وبعـدين ابدأ ادخل في كـل التفاصيل التقيله اللي بحتاج اعرفها سواء على مستوى البيزنس او على مستوى الـأعلانات ببدأ اقيس سرعه الموقع واداءه على الـ Desktop و الـ Mobile واشوف الـ Website كله مبني على بلاتفورم ايه وهل ممكن نعدلها او نسيبه عليها زي ما هو وأدخل بعديها على الـ Tracking اشوفه معمول Manual ولا اوتوماتيك ونـدخل بقا في الجزء اللي بعد كدا وهو الـ Pixel والـ Old Data ونشوف الـ Data هل هي كويسة ولا لأ.. جديدة ولا قديمة وكل حاجة ممكن تأثر على الأرقام بشكل او بأخر وتعالى بقا معايا نمسك الداتا القـديمة في كل البلاتفورمز اللي اشتغل عليها البيزنس وابدأ بص شهر ب

الـ Roadmap الخاصة بالـ Performance Marketer بسم الله الرحمن الرحيم والصلاة والسلام على رسول الله خليـنا نقـول ان الـ Performance Marketer بقت واحدة من أهم الوظائف الموجودة حاليا في مجـال الـ Digital Marketing وعشـان توصل لمرحلة الأحتراف لازم يبقا عندك Knowledge بحاجات كتـير غير جـزء الـ Dashboard انا هنا مش هكلمك ازاي تبقا اجمد واحد في الـدنيا لكـن هاخد معاك الطريق واحدة واحدة وأقولك ايه الأساسي المسـتوى الأول : الـ Foundation – الأساسيات لازم تكـون عـارف ان اي بيـت بيتبنى بيكون ليه أساس والأساس وعماويد يقوم عليها البـيت ده ومن غيـرهم البيت ده هيكـون عبارة عن شوية طوب من برة شكله حلو بس اي شوية هواء يوقعوه فـ حضرتك لو مش عنـدك الأساسيات الخاصة بالـ Marketing هتكـون عامل لوحة حلوة اوي بس راسمها على ورق كراسة الـ Basics اللي هنتكلم عليها هنا هي الأتي : – مبادئ التسـويق وهنـا هقولك على حاجات أساسية لازم تكـون عارفها في التسـويق زي : – المصطلحات : ودي على رغم انها تبان كلمة عاميه جدا الا انك لازم تكـون عارف كـل مصطلح بيعني ايه في الشغل اللي انت شغاله ولو عمـلت سيرش بسيـط بـ ” 100 Marketing Abbreviations & Digital Advertising Acronyms” هيجيلك مصطلحات كتير جدا تقـدر تقرأها وتعـرف معناها – الـ 4pc’s – الـ Buyer Persona – الـ Value Proposition – الـ Market Research – الـ Kpi’s الحـاجات دي تبان من برة مفاهيم سهله وبسيطة بس لو دخـلت جواها شـوية هتلاقي بحـر كبير تقـدر انك تطلع منه بمعلومات كتير جدا المعلومات دي كل اللي عايزك تطلع بيها منها انك تكـون ” فـاهم ” الحته اللي انت داخل فيها ودارس السوق والمنتج بتاعك كويس عشـان تعـرف تحدد ” المشـكلة منين بالظبط “ تاني حاجة محتاج تعـرفها بعد الـ Basics هي : الـ Funnel : ومصطلح الـ Funnel هنا عشـان متدورش عليه كتير هي الرحله اللي بيمشي فيها العـميل من اول ما بيشوفك ولحد ما بيشتري المنتج بتاعك عـرفت خلاص الـعميل بتاعك والـ Funnel اللي بيمشي فيها تالت حاجة انت هتشتغل في جـزء الـ Promotion فـ طبيعي يكـون عندك معـرفة بالأتي : – منصات الأعلانات بتاعتك ” جوجل – فيس بوك – تيك توك – سناب شات – لينكد ان – بنترست ” وغيرهم… والمعرفة هنا مش مطلوب منك نهائي انك تكـون أجمد حد في كـل دول لكـن تكـون عـارف الـ Basics بتاعت كل حاجة وعـارف هي بتستخدم امتى وليه وبـعدين انت كدا كدا هتتخصص في كام حاجة وتكـون شاطر جدا فيهم لكـن في العمـوم انت بيكـون عندك معرفة بكـل حاجة – الـ Tracking وهنا المقصـود بيه انك تكـون عـارف العمـيل بتاعك بيروح منك فيـن وبيقع فين بالظبط في الـ Funnel والـ Tracking هنا مش انك تعمل بيكسل بس وتربطه بالويب سايت بتاعك وشكـرا لأ خالص انك تكـون فاهم الـ Basics بتاعت الـ Tracking وعارف بيحصل ازاي عشـان لما تيجي تحصلك مشكلة وتكـون محتاج ليها حل Manual تكون عارف هتوصلها ازاي لكـن كونك عـارف بالحاجة بس بدون ما تبقا عارف اصلا في الأساس هي شغالة ازاي او ايه اللي بيحصل جواها هتبقا عارف القشور بس ليس الا – الـ Websites والجميل هنا بقا اني مش عايزك راجل Developer وبتعرف تبرمج ويب سايتس انا عـايزك تبقا عـارف الـ Environment اللي بتشتغل عليها عامله ازاي وازاي تقـدر تستخدمها عشان تطلع منها بأحسن نتايج فـ لو قولنا انك شغـال على حاجة زي ” WordPress – LightFunnel – Magento ” وغيرها.. انت مطلوب منك تكـون فاهم ايه دول والـ Customization فيهم ممكن يوصل لـ فين عشـان تقـدر تكون عـارف ايه ممكن تعمله وايه لأ – الـ Planning دي واحدة من أهم المهارات اللي المفروض تكـون عنـدك كـ واحد شغال في الـ Performance لأنك هيبقا مطلوب منك توزع الميزانية بتاعتك وتبني Funnel بشكل صحيح وتشتغل على اكتر من Platform فـ كل ده لو انت مش بتعرف تخطط صح الموضوع هيبقا بالنسبة ليك شبه مستحيل وهتبقا بتلف في ساقية مش عـارف انت عايز توصل لأيه… خلاص كدا انت بقا واضح عندك الرؤية بشكـل اوضح شوية تعـالى أقولك بقا على حاجة مهمة اوي رابع حاجة الـ Leadership : دي واحدة من أهم المهارات اللي لازم تتعلمها واللي هتوصلها بعد فتـرة من شغلك في الـ Performance وهنا بقا انا مش هكلمك على ادارة الفريق بس لأ خالص انت لازم تبقا عـارف انت بتطلع Reports ازاي وتبني Dashboard لشغلك بشكـل يخليك تطور في التيم بتاعك وفي الشغل بشكـل عام ويبقا عندك فهم للبيزنس بشكل عام من منظور تسويقي وتجاري أخر حاجة بقا في أدوات انت محتاج تكـون عارفها وتقـدر تتعامل بيها وأشهرها – Google Sheets – Looker Studio – Hotjar – Microsoft Clarity – Slack – Notion – Trello – GA4 طيب بعد ما عرفت شوية الحاجات دي بقا خليني أقولك في مصـادر كتير تقـدر تتعلم بيها كـل ده أهمها الـ Youtube واللي هتلاقي عليه كـل حاجة مجانيه تقـدر تعرف عنها الـ Basics عندك كمـان Hubspot Academy – Meta Blueprint والمـدفوع أهمهم DigitalMarketer , CXL وغيرهم وفي ناس مهم اوي تكـون متابعها زي Dara Denny – Ezra Firestone عـايز أضيفلك معلومة مهمة اوي : في مهـارات هتبقا محتاج تبقا عـارف عنها في شغـلك زي الـ Editing – Shooting – Designs – Ai المهـارات دي مش عشان تشتغلها قد ما عشـان تساعدك في الشـغل بشكل كبير وتسهل عليك المواضيع كلها.

المشكلـة عمرها ما كـانت في الكـامبين.. المشكلـة في طريقة تفكيرك. لو اشتغلت في جـزء البيرفورمانس فـ اكيد عديت بمـواقف زي دي : كل حاجة شكلها تمام – على الورق – نفس الكريتيف.. نفس الأودينس… نفس السيستم وبرغم كل ده النتايج وقفت فجأة الأسوأ؟ كل حاجة شغاله ” تكنيكال ” بس الـ Purchase اختفت تقريبا مفيش مبيعات وانت مغيرتش اي حاجة ! ساعتها السؤال الحقيقي : هو أنا فاهم المشكـلة فعلا !!! في نـاس بتقع في فخ ” الإجابات السريعة “ – نغير الـ Audience – نجرب كريتيف تاني – نعمل Duplicate للكـامبين – نغير الـ Ad Account وخليني أقولك ان ده هروب مؤقت مش مواجهة للمشكلة الحقيقة.. دي مش حلـول دي بنسميها ” مسكـنات نفسية “ مش شطارة انك تعمل كـامبين وتقول اهي نجحت معايا الشطـارة انك تفهم المشـكلة لما الكـامبين دي فشلت ! مهـارة حل المشكلات هي أكبر فرق بين اللي بيشتغل إعلانات واللي فـاهم Performance اللي فاهم Performance مش بيدور على حلول مؤقته للمشكلة ولكـن هو بيدور على Root Cause او حل جذري بيكـون عايز يفهم : – هل العميل مش عايز يشتري – هل الرسالة بتاعتي موصلتش – هل انا فعلا عامل التارجت للناس الصح مهـارة حل المشكلات مش تكنيك على قد ما هي ” نضج “ والنضج هنا المقصود بيه انك بتتعامل مع الأعلانات بتاعتك كأنها Keyboard وتبدأ تشوفها كأنها Reflection لعقلك وطريقة فهمك للبيزنس النضج إنك تشوف الإعلانات مش كأنها أداة… لكن كأنها انعكاس لعقلك وطريقة فهمك للمشكلة…. كل Impression كل Click كل Bounce كل Conversion ناقص… هو معلومة بتقولك حاجة الموضوع مش عشوائي أبداً. لكن هل أنت بتعرف تقرا الإشارات دي؟ ولا بتعديها وتركّز على “Spend ونتيجة” وخلاص؟ النـاس اللي بتنجح بإستمرار مش بتنجح عشان معندهمش مشاكل بالعكس الناس دي أكتر ناس حصلها مشاكل بس هما قرروا ميهربوش منها ويبدأوا يفكروا بنظام فيها… لو عايز تكبر فعلاً… اعرف إن اللي بينقل الناس نقلة مختلفة مش تعلم منصات، لكن تعلم عقلية تحليل المشاكل وحلها بمنهج. ابدأ دايمًا بـ 3 خطوات: 1- Define The real Problem المشكلة الحقيقة هنا مش ” الكامبين مش شغالة ” لأ اسأل نفسـك ايه اللي وقع مني وفين وليه ؟ في ايه اختلف قبل او بعد هل المشكلة توصيل ولا سعر ولا تارجت ولا غيرهم 2- Trace The System كل حاجة ليها سـبب فـ اعرف انت محتاج تبص على ايه عشان تعرف الأسباب من CTR, CPM, CPC وغيرهم شوف هل السـبب اول 3 ثواني في الفيـديو ولا السبب سرعه الموقع ولا ايه السبب بالظبط.. هل الناس بتوصل للينك فعلا وتمشي ولا الـ Checkout فيه Friction كل رقم في الـ System او في الـ Dashboard بتاعك بيقولك قصة… أقرأها… 3- Review your assumptions ممكن تكـون الفكـرة نفسها غلط مش التنفيذ فـ انت لو فكـرتك من الأول غلط او مش متأكد منها راجعها كويس قـبل ما تنفذ ممكن تبقى مشكلتك الأكبر إنك مقتنع بحاجة غلط. لو بتـدور على انك تكبـر في شغلك وتحقق فعلا حاجة كبيرة فـ النمو مش في الـ CPC , CTR المفتاح دايما في اللحظة اللي قررت تبص فيها على المشكلة بعيون مختلفة وفي الآخر… أوعى تفتكر إن الكبار في المجال مش بيقعوا. الكبار بيقعوا أكتر منك، بس عندهم نظام للتفكير، مش رد فعل عشوائي. اسأل نفسك : اخر مرة كامبين وقعت منك شفت فعلا مشاكلها وجربت تاني وحققت ولا سيبتها ودورت على اسباب تانية ! وبس كدا قولولي بقا شايفين حل المشكلات مهارة بتتولد في الشغل ولا منهج وتفكير محتاج انك تبقا عارفه !

خلاصة تجربة فتـرة مش صغيرة في مجال الملابس بقالي فتـرة بيجيلي مكالمات من شباب عندهم حلم يبدأوا مجال الملابس وناس عندها راس مال فعلا كبير تبدأ وناس حابه تبدأ صغيره وتتوسع لكـن القاسم المشترك في الموضوع ده انهم كلهم شايفين المجال ” مربح وسهل “ لـو بتفكر تدخل عـالم الـ Fashion وخصوصا مجال الملابس لازم تعرف إن المجال ده مش تصميم ولا بيع ده مليان تفاصيل وتقعيدات.. ولو دخلته من غير ما تكون فاهم ممكن تخسر وقتك وفلوسك… نصيحة 1 : لو عمرك ما اشتغلت في الفاشون أو لمست الخامة بإيدك أو وقفت مع ترزي وشوفت بيقص إزاي، متدخلش بقلب جامد! هحاول اوضحلك التفاصيل والخيارات اللي قدامك والأسئلة اللي تسألها لنفسك عشان تعرف تبدأ صح.. خليني أقولك الأول ليه الناس بتفكر في الـ Fashion وهما 3 اسبـاب : – الطلب مستمر : الناس مش هتبطل تشتري لبس – السوشيال ميديا : التيك توك وانستجرام مليانين لوكال براندز وده خلى الناس تشوف المجال سهل ومغري – الإمكانيه : ودي أغلبنا بيشوفها في الأول سهله ان هو ايه يعني هروح جسر السويس واجيب قماش واتفق مع مصنع وسهله اهي بس الحقيقة؟ المجال ده زي أي بيزنس تاني، محتاج تخطيط، معرفة، وصبر. لو داخل بس عشان شايف ناس بتعمل فلوس، هتتعب. تعالى اكلمك في الخيـارات المتاحة قصادك وانت بتبدأ براند ملابس وهما 3 برضوا : الأختيار الأول : انك تروح تشـتري منتجات من ” مكـاتب ” وتبدأ تبيعها بس في الحالة دي هيبقا مطلوب منك انك لما تشتري تشتري ” سريهات ” والسريهات يعني انت بتاخد المنتج بمقاساته والوانه فـ كـ مثال لو عندك منتج في منه 4 الوان بـ 4 مقاسات فـ انت بتاخد الـ 4 الوان بـ 4 مقاسات = 16 قطعة مش بتختار لون او مقاس معيـن الأيجابيات : قليل المخاطرة : مش محتاج تستثمر في تصنيع أو خامات سريع : تقدر تبدأ البيع في أيام مناسب للمبتدئين : لو معندكش خبرة في التصنيع، ده خيار آمن جدا السلبيات : ربح قليل : عشان المنتجات جاهزة هتضطر تبيع بسعر قريب من السوق فهامش الربح بيكون ضعيف قلة التميز : المنتجات دي ممكن تكون موجودة عند براندات تانية فصعب تبني هوية مشكلة المخزون : لو اشتريت سريهات وما اتبیعتش، هتتكلف تكاليف تخزين أو خسارة ف منتج مركون نصيحة 2 : لو هتختار الخيار ده ركّز على التسويق لازم تبيع القطع بسرعة عشان فلوسك ما تقعدش “مركونه” في المخزن الأختيار الثاني : انك تروح لـ مصنع تقوله انا محتاج ” المنتج ده ” وتديله صورة المنتج وهو بيبدأ يقولك هو ممكن يعملهولك ب خامة ايه وهيبقا حسابه كام إزاي بيحصل؟ بتروح لمصنع (أو أكتر من مصنع) وتشرحلهم فكرتك ممكن تكون صورة تيشيرت معين أو جاكيت بشكل معين المصنع بيحدد الخامات المتاحة (قطن، بوليستر، إلخ) والتكلفة بناءً على الكمية بتتفق على تفاصيل زي المقاسات، الألوان، والتشطيب (زي الطباعة أو التطريز) الأيجابيات : تحكم أكبر : بتقدر تصمم حاجة قريبة من اللي انت عايزه تميز أكتر : المنتج هيبقى حصري أكتر مش شبه شغل المكاتب ربح أعلى : لو اخترت خامات كويسة وصممت منتج كويس هتقدر تبيع بسعر أعلى سلبيات: محتاج خبرة : لازم تكون فاهم شوية في الخامات والمقاسات عشان المصنع ما يضحكش عليك مخاطرة أكبر : لو المنتج متبعش هتخسر فلوس التصنيع والخامات وكل حاجة مشاكل الجودة : بعض المصانع بتستخدم خامات أقل جودة من اللي اتفقت عليها أو بتعمل مقاسات غلط نصيحة 3 : ابحث كويس عن مصنع محترم زور المصنع بنفسك وشوف عينات من شغلهم اتأكد إنك بتتعامل مع ناس بيحترموا المواعيد ومش هيضيعوا وقتك ولو لقيت مصنع كويس حاول تبني معاهم علاقة طويلة عشان هتحتاجهم الأختيار الثالث : انك تروح تصنع ” بنفسك ” وفي الحالة دي حضرتك بتنزل تشتري الخامات اللي عايز تشتغل فيها وبتروح تدور على المصنع اللي هتشتغل معاه وتدور على حد يعملك باترون وتتابع مع المصنع والتقفيل بتاعه وتدخل في كل الـ Process بتاعت التصنيع بأيدك يمكـن ده الخيار الأصعب والأكثر تعقيدا بس ممكن يبقا الأكثر ربحية لو عرفت تديره صح… فكرة انك بتتحكم في كل خطوة في عمليه التصنيع بنفسك من شراء الخامات لحد التغليف فكـرة تخليك تطلع كل جنيه بيتصرف في مكانه الصح إزاي بيحصل؟ شراء الخامات : بتروح تشتري القماش بنفسك من السوق أو من موردين تصميم الباترون : بتدورعلى مصمم باترون عشان يعملك المقاسات اختيار المصنع : بتتعاقد مع مصنع عشان ينفذ القص والخياطة والتشطيب متابعة العملية : بتراقب كل خطوة (القص، الخياطة، الطباعة، التغليف) عشان تتأكد إن كل حاجة بتتم زي ما إنت عايز إيجابيات : تحكم كامل : المنتج هيبقى بالظبط زي ما إنت متخيله هوية قوية : بتقدر تبني براند مميز جدًا لأن المنتجات معمولة بإسمك ربح عالي : لو نجحت في تصميم منتج مطلوب هتقدر تحدد سعر مرتفع وتكسب هامش ربح كبير سلبيات: محتاج خبرة كبيرة : لازم تكون فاهم الخامات، المقاسات، التصنيع، وحتى التفاصيل الصغيرة.. مخاطرة كبيرة : لو حاجة اتعملت غلط (زي خامة مش مناسبة أو مقاسات غلط)، الخسارة هتبقى كبيرة…. وقت ومجهود : هتضطر تتابع كل حاجة بنفسك وده بياخد وقت وطاقة نصيحة 4 : لو هتختار الخيار ده ابدأ بـ حاجات بسيطة وجرب تصنع كميات محدودة وشـوف السوق هيقولك ايه لو لقيت الناس عجبهم المنتج ابدأ زود الكمية تدريجيا ولو معندكش خبرة حاول تتعلم من حد فاهم وعنده خبرة أفضل ليــكـ في بقـا شوية اسئلة لازم تسألها لـ نفسك قبل م تبدأ – هل انت محدد الفئة اللي هتشتغل عليها ؟ هتعمل ملابس شباب؟ بنات؟ أطفال؟ ملابس رياضية؟ كاجوال؟ فورمال؟ لازم تعرف مين جمهورك بالظبط (عمر، ذوق، إمكانيات مادية)…. – عارف الخامات اللي هتشتغل فيها ؟ مش كل قماش ينفع لكل منتج. لازم تفهم إيه الخامة المناسبة للمنتج بتاعك (مثلًا، التيشيرتات محتاجة خامه والبناطيل محتاجة خامة تانية ) لو مش فاهم في الخامات، ممكن حد يضحك عليك ويديهالك ب 3 اضعاف سعرها… – متخيل الـ Cashflow هيدور ازاي ؟ هتعرف تدير فلوسك إزاي؟ هتدفع للمصنع كاش ولا تقسيط؟ لازم تحسب هتسترد فلوسك في قد إيه، وهتقدر تستثمر في منتجات جديدة إزاي….. – عارف الـ Operation Cycle الخاصة بالمشروع ده ؟ يعني فاهم إزاي هتختار الخامات، تصنع المنتج، تخزنه، تسوّقه، وتبيعه؟ لازم تعرف كل خطوة وتكلفتها عشان ما تتفاجئش بنفقات مكنتش متوقعها. لـو فهمت الأسئلة دي صح وعـرفت تجاوب عليها اجابات سليمة رؤيتك لكـل حاجة هتتغير… طيب ايه التحديات الشائعة في الحته دي ! مشكلة الـ Fashion إنها بتبان سهلة من برا بس

المنـتجات الـترندي كمـا لم تسمعها من قـبل بسم الله الرحمن الرحيم والصلاة والسلام على رسول الله لـو بتشوف بوستات كتير عن ميديا بايرز بيحققوا نتايج ضخمة و كوست قليل فـ أغلب البـوستات دي بتكـون لـ Trendy Products طب تعالوا نعرف الأول ايه هي الـترندي برودكت… وامتى بدأت التـرندي برودكتس : هي المنتجات اللي بيكون عليها اهتمام مفاجئ وكبير في السـوق… وبتعمل مبيعات كبيرة في وقت قـليل ومش بتكـمل على نفس الريتم لكـن بتموت مرة واحدة بدأت امتى ! في الحقيقة يا صديقي الترندي بردوكت ظهرت من أيام الفراعنة.. لما الناس كانت بتجري ورا ” الموضه ” زي الكحل او الزيوت العطرية… بس لو هنتكلم على شكلها الحالي فـ خلينا نرجع شوية لـ ورا القـرن الـ 18 وقت الثورة الصناعية وقـت ما ظهرت الألات زي ماكينات النسيج والخياطة.. الملابس بقت بتتصنع بسرعه كبيرة والناس بقت تعمل لبسها ل نفسها ويشتروا حاجات جاهزة بأسعار ارخص وهنا بدأت فكـرة ” التـرند ” وتوصل للناس بسرعه الستينات والسبعينيات : الشباب بدأوا يعملوا ثورة في عالم الموضة وبقوا يبصوا على الملابس ك وسيلة تعبير عن نفسهم مش حاجة بيلبسوها وخلاص وبقا الطلب على الحاجات الرخيصة والعصرية زيادة ومن هنـا ظهر مصطلح الـ ” Fast Fashion “ التسعينات وانتشار الأنترنت : بدأ ينتشر سوق الأونلاين وبدأت هنا فعلا تظهر ” الـ Trendy Product ” وصحيفة زي نيويورك تايمز استخدمت مصطلح ” Fast Fashion ” لأول مرة عشان توصف ” Zara ” اللي بدأت تصمم كل اسبوعين موديل جديد.. الـألفينات وبداية السوشيال ميديا : لما بدأ يظهر منصات التواصل الأجتماعي بدأت فعلا ظهور ” الـ Trendy Products ” بشكل كبير جدا.. بقا اي فيديو يـ Go Viral يخلي المنـتج اللي فيه ” Trend ” في خلال يومين…. ازاي بقا الـ Trendy Products بقت ظاهرة ! لا أخفي عليك عزيزي القارئ ان المنتجات مش عشان بقت بتتصنع بسرعه ده كان دليل على ظهور الـمنتجات دي لكـن التكنولجيا غيرت اللعبة الأنترنت والهواتف الذكية خلوا الناس يشوفوا المنتجات في ثانية بدل ما كنت بتمشي في الشارع تشوف ايه الجديد دلوقتي بتفتح التيك توك تشوف اعلانات لمنتج X وتقول ” انا عايز ده “ السوشيال ميديا والفيديوهات القصيرة بقوا هما اللي بيحددوا ايه الـ Trend.. فيديو لـ أداة طبخ ذكية بقا يجيب ملايين المشاهدات وفجأة الناس كلها عايزة تشتريها سيكولوجية الناس بقت بتحب الحاجات الجديدة عشان بتحس انها بتخليهم مميزين وبتحل مشكلة ( حتى لو مش حقيقية ) الـ FOMO بقت تخلي الناس تشتري بسرعه عشان خايفة المنتج يخلص او الترند يروح نصيحة 1: لو عايز تبيع ترندي برودكتس ركز على الإحساس اللي هتديه للعميل هل هيخليه يحس إنه مميز؟ هيحل مشكلة؟ ولا هيخليه يحس إنه جزء من موجة؟ افهم ده، وهتعرف تبيع. تعالى أقـولك بقا شـوية حاجات تفيدك لو قـررت انك تشتغل في الـ Trendy Products – المنتجات دي من أكتر المنـتجات اللي ممكن تعملك فلوس ” بسـرعة ” لكـن صعب انها تحقق ” استقرار ” للبيزنس بتاعك في الـ Trendy انت تقـدر تجيب منتج بـ 100 وتبيعه بـ 6 اضعاف سعره لـو هو فعلا تـرند فـ نقدر نقول انها هتكسبك كتير وبسرعه – المنتجات دي أكتر منتجات بتحـاول الناس تضرب الـ Quality بتاعها وخليني أقولك اللعبة دي بتتلعب ازاي منتـج طالع Trend في ” الصـين ” على سبيل المثال.. المنتج ده بيتصنع في 3 مصانع كـل مصنع بدرجة انتاج مختلفة في تجـار بيعلبوا لعبة ” انا هجيب الحاجة الكويسة اللي تعملي اسم “ وفي تجار تانيين بيلعبوا لعبة ” انا هجيب اي حاجة وابيع كتير واكسب عشان ده ترند “ في الحالتين التجار بيكسبوا مش بيخسروا لكـن اللي فعلا هيخسر جامد هو انت لما تبيع منتج وحش جدا على اساس انه كويس ومتكونش حتى مجربه – مش اي منتج عليه ” مشـاهدات ” كتير يبقا Trendy او Winner Product – ولو مشوفتش البوستات اللي كنت كاتبها في الـجزئية دي اكتبلي كلمة Winner في الـ Comments وهبعتهالك – فـ انت وانت بتختار أعرف الحاجات اللي تقول على اساسها المنتج ده كويس أجيبه ولا مش هينفعني بـ حاجة – المنتجات دي بتتحرق بسرعه جدا.. فـ متجبش استوك تحطه جنبك عشان ميتحطش جنبك طول العمر فعلا.. انهاردة الناس عايزة الصبارة الراقصة… بكرة عايزيين سماعه شكلها حلو… بعده عايزين ساعة شكلها حلو والخ الخ – المنافسة على المنتجات دي بتكون شرسة لأن مش انت اللي بتفكر لوحدك.. كل يوم في الف واحد زيك بيحاول يبيع نفس المنتج.. لو معرفتش تكـون مختلف هتقع في فخ المنافسة ومش هتطلع منه – الأستوك في المنتجات دي مش سهل يتجدد وبياخد وقت فـ على ما ياخد وقته وتبدأ تجدد ستوك تاني هيكون المنتج مات وشبع موت… فـ الأفضل ليك تجيب الكمية كاملة اللي انت عارف انك ” قـــادر ” تخرجها وتخلصها وشكـرا… نصيحة 2: شـوف تاجر أمين اتعامل معاه وبلاش شغل تحت السلم عشان العملاء جابت اخرها… لو هتشتغل مع أفيليت بقا تعمل ايه ؟! جـزء كبير من الـ Affiliate Networks شغلهم قائم على الـ Trendy Products وفي الغالب جزء صغير اوي اللي مش هتلاقي عنـده Internal Team ماسك المنتجات دي وبيعصرها عشان يطلع أعلى Profit طب انت دلوقتي لو هتشتغل معاهم ومش قـدامك غير الجزء ده عشان انت متعرفش موردين ومش عـارف تعمل ايه.. كل اللي هتعمله انك هتبدأ تدور على Products مش ناس كتـير شغاله عليها وتـحاول على قـد ما تقدر ” تخلق ” لنفسك الترند ده ” تدور ” على حاجة تخلي الناس عايزة تشتري فعلا… لو عرفت تعمل دي اي منتج هتقابله بعد كدا هيبقا بالنسبة ليك Winner وقادر تشتغل عليه.. نصيحة 3: متروحش لأكتر أفيليت مشهـور… روح لأكتر واحد ” مناسب ليك “ أنواع التـرندي برودكتس… قبـل ما نكمل لازم نفهم ان مش اي منتج عليه ضجة على السوشيال ميديا يبقى زيه زي غيره.. الترندي ليه اشكال وانواع وطريقة للتعامل كـ مثال : – الترندي الموسمي ” Seasonal Products “ ده التـرند اللي بيظهر في وقت معين زي : العيد – رمضان – ادوات تخييم الصيف وده لازم تخطط ليه قبلها ب فترة وتكـون جاهز للموسم اللي جي ليك لأن الناس كلها بتشتغل عليه ولو اتأخرت هتدخل متأخر الموسم – الترندي اللحظي ” Viral Trendy Products “ ده بيطلع من ولا حاجة… فيديو واحد قادر يخلي منتج ترند في كام ساعة وممكن يكون مش جديد ولا اي حاجة وطبعا المثال الأشهر ” الصبارة الراقصة “ خليك متابع الترندات اول بأول عشان تبقا جاهز للموضوع ده بالذات لأن دي من اهم انواع

في 2024، التجارة الإلكترونية العالمية وصلت لقيمة 5.8 تريليون دولار، ومتوقع تتخطى 8 تريليون بحلول 2027.. لو كنت بتفكر تدخل ” التجارة الألكترونية ” او عايز تفهم ايه معناها فـ البوست ده هغطي معاك الموضوع بشكل سهل وواضح ولو مش هتقرأ البوست دلوقتي فـ اعمله Save عشان هتحتاجه.. يعني إيه E-Commerce ؟ التجـارة الألكترونية هي عملية بيع وشراء المنتجات أو الخدمات بإستخدام الوسائل الألكترونية زي ” الأبلكيشنز – السوشيال ميديا – الويب “ خليني أبسطلك الموضوع شوية… التجارة الألكترونية هي انك تشتري الحاجة وانت قاعد في البيت من غير ما تنزل محل او تروح مكان تشتريها منه سواء اشتريتها من موقع زي ” امازون ” او من ” بيدج ” على السوشيال ميديا او حتى ” موقع ” من المواقع الموجودة اونلاين دول كـام مثال تفهم بيهم أكتر – اشتريت تيشيرت من ” امازون ” ” نون “ – تحجز كورس اونلاين من منصة زي ” يوديمي ” ” كوريسيرا “ – تطلب أكل من تطبيق زي ” طلبات ” ” بريد فاست كل دي من أنواع التجارة الألكترونية مع أختلاف أشكالها وانواع الـبيزنس.. ايه الفـرق بين التجارة الألكترونية – التجارة التقليدية ” الأوفلاين ” ؟ التجـارة الألكترونية شبه التجارة الأوفلاين في الأساسيات اللي هي : – بائع ( تاجر ) – شاري ( العميل ) – منتج او خدمة الفـرق هنا بيجيي في طريقة البيع مش في نوع البيعه… التجارة الأوفلاين : بتعتمد على مكان فيزيائي ( محل – سوبر ماركت – مول ) وليها مواعيد فتح وقفل وبتحتاج تروح بنفسك تشتري التجارة الأونلاين : كل حاجة بتحصل اونلاين.. الأستور بتاعك مفتوح 24/7 وأي حد في العالم ممكن يشتري منك.. ده مثال ممكن تفهم بيه اكتر.. لو عندك محل ملابس في شارع معين ف العميل لازم يجيلك المحل ويشوف منتجاتك ويشتري ولكن في التجارة الألكترونية العميل بيدخل موقعك او صفحتك على انستجرام يشوف صور المنتجات ويقرأ الوصف ويشتري… ايه المميز في التجارة الألكترونية ؟ انتشار التجارة الألكترونيه كان ليه شوية اسباب جوهرية ومنها : 1- موجود في كل مكان : الأستور بتاعك ممكن يتشاف من اي حد في اي مكان في العالم… 2- مفتوح 24 ساعة : على عكس المحلات اللي بتقفل الساعة 10 بليل.. الأستور بتاعك بيكون مفتوح طول الوقت واي حد ممكن يطلب منه اي وقت 3- توفير التكاليف : مش هتحتاج تدفع ايجار محل ولا فواتير كهرباء ومياه او حتى رواتب موظفين وكل ده بيوفرلك فلوس تقدر تستثمرها في تحسين المنتج بتاعك 4- الأستهداف : بتوصل للعملاء اللي انت عايزهم في الوقت اللي انت تحدده وتوصلهم المنتج المناسب ليهم كمان 5- مرونة في التوسع : لو عايز تبيع منتج جديد او تدخل سوق جديد التجارة الألكترونية هتسهل عليك ده من غير ما تحتاج تفتح فروع جديدة… أنواع التجارة الإلكترونية ؟ التجارة الألكترونيه مش بس بيع منتجات على موقع فيه انواع مختلفة على حسب الطريقة 1- الـ B2C : وهي الأشهر ودي معناها البيع المباشر للعميل.. يعني العميل بيشتري من البيزنس على طول واشهرها طبعا ” نون ” ” امازون “ 2- الـ B2B : وهنا الشركات بتبيع ل شركات تانية.. كـمثال لو شركة بتقدم مواد خام وبتبيعها ل مصنع تاني ف الخدمة كدا الشاري والبايع بيزنس مش اشخاص ف بتتحول نوع التجارة لـ B2B 3- الـ C2C : ودي من فرد لـ فرد تاني وأشهر حاجة ممكن اذكرها ليك هنا هو ابلكيشن زي olx وان الناس عليه بتبيع الحاجات المستعمله ل ناس تانية والبيزنس كله قائم على انه ناس ب تبيع ل ناس 4- الـ C2B : وده الشخص اللي بيقدم خدمة لـ بيزنس كامل زي الـ Freelancer 5- الـ D2C : ودي الشركة بتبيع مباشرة للعميل بدون وسيط زي براندات ” Adidas – Nike “ إيه التحديات في التجارة الإلكترونية ؟ الحياة مش وردي في الـتجارة الألكترونية ولا الناس بتكسب فيها ملايين من اول يوم لكـن لازم تكون عارف ان على قد ما هي مميزة على قد ما فيها تحديات وأمثله للتحديات دي : 1- المنافسه 2- ثقة العملاء 3- الشحن والأوبريشن 4- التسويق 5- الحسابات وعلى قد ما الحاجات دي تبان سهله الا ان التركيز عليها هو اللي قادر يقوم البيزنس بتاعك وهو اللي قادر يوقعه.. هل التجارة الإلكترونية صعبة؟ الصعوبة والسهولة مش في التجارة الألكترونيه لكن في طريقة تفكيرك انت.. لو عندك خطة واضحة ومستعد تتعلم وتخسر هتقدر تنافس وتشتغل كويس الناس اللي بتبدأ وتستنى الأرباح من أول شهر من غير تخطيط بيخسروا بسرعة ليه المحلات التقليدية بدأت تتحول للتجارة الإلكترونية ؟ التواجد الأونلاين بقى ضرورة مش رفاهية… لو محلك مش موجود على الإنترنت فـ انت فعلا مش موجود ل ناس كتير… الناس بقت بتدور على جوجل عن كل حاجة والسوشيال ميديا بقت بتبيع اي حاجة… سلوك العملاء اتغير والناس بقت تحب حتى قبل ما تروح مكان تشوفه عامل ايه اونلاين.. سواء عروض او سوشيال ميديا او غيرها الخلاصة… التجارة الألكترونية مش مجرد ترند لكن هي مستقبل التجارة.. سواء كنت صاحب بيزنس صغير او محل تقليدي التواجد الأونلاين بقى ضروري عشان تواكب السوق.. الموضوع مش صعب لو عندك خطة وشغف لأنك تكبر واستعداد انك تتعلم وفي الختام لو عجبك البوست ده متنساش تدعيلي دعوة حلوة.. وتعمل لايك وشير وفولو عشان تساعد ان العلم يوصل لـ ناس كتير شكرا

الموضوع ملوش علاقة ب مدى شطارتك.. الموضوع ليه علاقة ب مدى ” إلتزامك “ لو عندك شغف كبير اوي ناحية الشغل والمجال اللي أنت فيه ولكن مش ملتزم اعرف انك بتحفر بير تندفن فيه مش تشرب منه مياه. النجاح مش بيحب الناس اللي بتتحمس يوم وتكسل عشرة النجاح بيحب اللي بيصحى كل يوم ويشتغل حتى لو مش عايز او حتى لو الظروف مش مساعداه الـ consistency بتهزم الـ talent لما التاني يغيب مفيش shortcut اللي ملتزم كل يوم بيعمل حاجة صغيرة بتقربه من هدفه هيوصل أسرع من أي حد تاني مش لازم تبقى عبقري… بس لازم تبقى ثابت مش لازم تعمل كل حاجة صح… بس لازم تكمل مش لازم الناس تصقفلك… بس لازم انت تفضل ماشي وبس كدا. شكرا

من ميتنج تعـارف لـ خطة كاملة للبيزنس كله.. من فتـرة دخلت ميتنج مع شبـاب عندهم بيزنس قائم عاملين فيه حجـم Growth كبير مش صغير في فترة قليلة لكـن بعد الـ Growth ده بقوا بيحرقوا راس مال كل شهر في خسـاير ومش عـارفين حل المشكلة ممكن يكون ازاي. البيزنس نفسه كان محتاج تحليل والتحليل ده أخد مني حوالي 12 ساعة شغل اللي حصل مع العميل ده خلاني أفكر قد ايه أوقات كتير صاحب البيزنس بيكون جوا الصورة لدرجة تمنعه من انه يشوف الصورة كاملة بدأنا بفهم للبيزنس والأهداف بتاعته والتحديات اللي بتحصله وبقيت شايف البيزنس زي ما هو شايفه بالظبط وبعديها قعدنا ميتنج 3 ساعات تقريبا مش بنتكلم فيه عن إعلانات ولا تسويق ! في الـ 3 ساعات انا كنت مجهز تحليل كامل لصورة البيزنس – الأيرادات والمصاريف – دورة راس المال – المخزون – الفريق – التسويق لما راجعنا الأرقام لقينا : الأيرادات بتتقلب بشكل غريب في شهور المبيعات فيها بتوصل لـ أعلى حاجة وصلتها وشهور تانية بتهبط بدون سبب الكاش فلو كان بيتجمد في المخزون ل فترات طويلة وفي منتجات مركونة بقالها فترة فعلا مش بتتحرك مفيش جدولة ل ديون الموردين وممشينها بالتراضي بين الطرفين ( وده مش صح ) الفريق الداخلي كان عنده وقت كتير بيكون فاضي فيه لأن مفيش سيستم واضح يتحرك فيه او يبقا عارف ايه الـ Next step المشكلة الكبيرة كانت في الـ Supply chain لما تعمقنا شوية في التحليل لقينا ان سلاسل التوريد هي الـ Bottleneck اللي بيوقف كل حاجة كان في تأخير واضح ممكن يوصل ل شهر وشهرين في ان يوصل المنتجات وفي نقص منتجات واضح وفجوة كبيرة بين المبيعات وتوقعات الطلبات النتيجة : الكاش فلو متجمد والتسويق واقف لأن المنتجات مش كفاية ! الحل كان ان يتعمل Plan واضحة للمبيعات والتوريد متبقاش عشوائية وتبقا متناسبة مع الـ Overhead اللي موجود ويكون فيها Buffer stock او مخزون احتياطي لو لا قدر الله حصل حاجة والأستوك اتأخر لما الجزئية دي بدأت تظهر لقينا ان راس المال هيلف بشكل اسرع وكمان مش هيبقا فيه لخبطة بين المبيعات ولا حرق لراس المال في Overhead علينا أخر الشهر ضيف على كدا ان الـ Team مش هيبقا قاعد فاضي وهيكون شغال طول الوقت وهنا مكنش الـ Target اننا نعمل 1000 اوردر كل يوم لكن الـ Target كان اننا نوصل لعدد الطلبات اللي يخلي البيزنس مكتفي ب نفسه هنا المشكلة مكنتش في تسويق… لأن البيزنس من جوه في مشاكل واي تسويق هيتعمل هيضيع لأن حالة البيزنس مش قوية هتبقا بالظبط عامل زي العربية من غير بنزين نصيحة : لو انت صاحب بيزنس ابدأ من جوة الأول وراجع كل حاجة قبل ما تفكر في الأعلانات التحليل للبيانات بتاعتك هي اللي هتوريك المشاكل الحقيقة وهتساعدك تلاقي حلول الحلول المؤقته دايما بتوقف النار لكن مش بتطفيها وبس كدا

لو أوقات كتير مش بتركز بشكـل كافي أو حاسس انك مش بتنجز ويومك بيخلص فـ ركز معايا 5 دقايق في البوست ده وانا هقولك الحـل بسم الله الرحمن الرحيم والصلاه والسلام على رسول الله اللهم افتح علينا فتوح العارفين، وعلّمنا ما ينفعنا، وانفعنا بما علّمتنا، وزدنا علماً انا كنت بعاني من نفس المشكلة دي – مفيش تركيز – مفيش انتاجيه – مفيش شغل وفي الحقيقة لقـيت اغلب الناس بتقولي دور على ازاي تركز وازاي تزود انتاجيتك وابلكيشنز ازاي تنظم وقتك وازاي تنظم التاسكات وغيرها لكـن كل ده مكنش المشكلة المشكلة عزيزي القارئ طلعت في ” البيئة اللي حواليك “ لو البيئة اللي حواليك مش مهيأه انك تشتغل مهما حاولت هتفضل مش عارف تشتغل المكان اللي حواليك مش منظم… دماغك هتكون مشوشة مفيش مكتب مريح… هتفضل قاعد تعبان موبايلك بيبعتلك نتوفكيشن طول الوقت.. مفيش تركيز اللي حواليك مش فاهمين انك لازم تركز.. هتفضل مشتت وفيش الحقيقة اللي فتح دماغي للموضوع ده هو فيـديو لـ الراجل المحترم ” احمد ابو زيد “ بعنوان ” كيف تصمم بيئة النجاح “ اتكلم فيه عن بيئة النجاح وتبنيها ازاي وازاي تفصل بين كل حاجة بتعملها والتانية عشان تفضل مركز قدر الأمكان وفي كتاب Atomic Habits لـ James Clear كان بيقول Environment is the invisible hand that shapes human behavior البيئة هي اليد الخفية اللي بتشكل سلوك الإنسان ابدأ جرب.. – نضف المكان حواليك وخليه هادي – جهز مكتب تشتغل عليه وكرسي كويس ومريح – اقفل اي حاجة بتحسب تركيزك – فهم الناس حواليك ان الوقت ده للشغل مينفعش حد يقطعه عليك قبل ما تلوم نفسك على قلة الإنجاز بص حواليك.. هل فعلا البيئة دي بتساعدك تشتغل! وفي الختام بشكرك انك وصلت للجزء ده من البـوست ولو استفدت حاجة او عندك تجربة في نفس الموضوع شاركها معانا لعلنا نستفيد جميعا وبس كدا

15 الف أوردر – 8 مليون مبيعات بـ نسبة تسليمات 38% ! بسم الله الرحمن الرحيم والصلاة والسلام على رسـول الله خليني أقولك ان ده مش بـوست عادي دي رحلة صغيرة حصـلت معايا ونتايجها ايه وغلطاتي كانت فين كمان وممكن أقسم البوست على كام بوست بحيث اتكلم في كل التفاصيل تعالوا احكيلكم القصة بقا بـعد الـ Session بتاعت SDN اللي كنـت عاملها عن الـ Product Selection دخـلت تحدي مع نفسـي اني أحط نفسي مكـان الناس وانفذ كل الحاجات من اول وجديد عشان أعرف اذا كنت فعلا قـدرت أقول كل حاجة تخليهم يشتغلوا ويختاروا منتجات صح ولا لأ وبالفـعل دخـلت عملت كـل اللي انا قولته في الـ Slides من أول اختيـار الـ Niche والتـدوير على المـنتج وغيرها من الحاجات اللي اتكلمنا فيها ( لو حـابب تشوف السـيشن فـ هي موجودة دلوقتي مسجلة على الـ Circle الخاصة بيهم ) طيب دخـلت دورت على 5 منتـجات تقـريبا في الـ Fashion عشـان ده اسهل حاجة ممكن تتصنع بالنسبة ليا والخطـوات اللي جت بعد ما اخترت المنتجات كالأتي ( هنشرحها بالتفصيل في بوست تاني ) : 1- عملت ويب سايت صغير ( هوم بيدج – لاندينج بيدج ) 2- أد اكونت فيس بوك ( مكنش فاتح ليميت كمان وقتها ) 3- بدأت ادور على الـ Material الخاصة بالمنـتجات اللي هبـدأ اشتغل عليها ( Creatives ) 4- شفت حد يقـدر يصنع المـنتجات دي وتكلفتها كام 5- جهزت الـ Pricing على نسـبة تسليمات 40% 6- رفعت المنتجات على الويب سايت بـ لاندينج بيدج بسيطة اوي مفيهاش اي حاجة غير وصف المنتج والمقاسات بعـد تجهـيز كـل الحاجات اللي فوق دي بدأت أعمـل الـ Test على أول 3 منـتجات ومـاشاء الله مفيش ولا منتج اشتغل كـويس او حتى جاب نتايج تخليني أقـدر أكمل فيه وهنـا بدأت أطلع المشـاكل اللي حصـلت في أول 3 منـتجات وإيه اللي مخلهمش يشتغلوا… بس دي هنتكلم عنها في بـوست تاني تعـالى اكلمك عن أخر منتجـين جربت عليهم واللي في منهم واحد نجح والـكوست بتاعه كان معايا 7ج انا أول ما شفت الـ Cost كدا قولت بس هو ده المنـتج اللي مفروض نكـمل عليه… والمنطقي انك هتسمع ان انا بدأت اسكيل بقا واطلع 1000 اوردر في اليـوم بس ده محصلش – ركز اوي او اوي هنا – انا فضـلت أول أسبوع مجبش أكتر من 100 أوردر بس في اليـوم وكنـت بحـاول على قـد ما أقدر أنزل بالـ Cost على الرغـم ان في ناس كتير بتحب انها تزود عدد أوردرات كبير عشان تمسك حجم كاش كبير انا الجنب التاني بحب أكتر أشتغل بـ Cost قليل عشان احافظ على الـ Margin وهنا كان عندي Objective تاني وهي اني أفضل محافظ على الـ Cost لغايت م اوصل لـ 5000 – 6000 اوردر بحيث لو الكـوست زاد مني في الـ 10000 او الـ 15000 أوردر يبقا Over all الدنيا معايا تمام والـ Cost مظبوط بشكـل كبير والحمدلله انا قـدرت احقق ده عشـان اوصل لـ صرف 363724 الف ج ب مبيعات 8 مليون ج و كوست أقل من 25ج طبعا انت دلوقتي عينك بتلمع وبتقول واو ايه المجال اللي بيجيب الفـلوس الكتـير دي تعـالى بقا اوريك الجنب التاني اللي مـحدش يعـرف عنه حاجة اه احنا جايبين عدد أوردرات كبـير جدا بـ كوست كويس مش وحش لـكن تعالى نبص على تسـعير المنتج ونسبة تسليماته المنـتج كان متسعـر بـ 395ج شـامل الشـحن وكـنا بندفع شحـن تقـريبا حوالي 85ج يبقا انت كدا المنـتج معاك من غير الشحن بيتباع بـ 310ج هتشـيل منهم الـ Cogs بتـاع المنتج حوالي 180ج يبقـا انت اتبقا ليك 130ج دول المفـروض تخصم منهم حاجتين ” مصاريف الأعلانات – مصاريف التشغيل” طيب فلوس الأعلانات على الـ Dashboard تقريبا 25ج ونسبة تسليمات 40% فـ انت كدا عندك فلوس الأعلانات بس حوالي 65ج وانت كان معاك 130ج فـ انت كل اللي بتكسبه 65ج ” ملحوظة احنا لسا مشيلناش مصاريف التشغيل ” عـايزك بقا تتخيل ان قصـة النجاح دي أخرها 20ج ربح ! تعالوا بقا نمشي الخطوات مع بعض ونشوف احنا غلطنا في ايه 1- طلعت منتج وينر ؟ اه وكان شغال كويس جدا 2- عملت Test بشكـل صح ؟ اه وكان الـ Cost مظبوط 3- سـعرت صح ؟ لأ مكنش التسعير احسن حاجة 4- نسبة تسليماتك كانت كويسة ؟ لأ برضوا 5- تصنيعك ومرتجعاتك كانت ماشية مع بعضها ؟ اه 6- الأوبريشن كان مستحمل عدد الأوردرات ؟ اه برضوا يبقا الملخص اننا كـل اللي كـان ناقصنا نعدله هو حاجتين 1- التسـعير واننا نحط Margin أعلى من المحطوط او نخلي الشـحن على العميل او حتى جزء منه 2- التسليمات والمرتجعات كانت مفروض تزيد عن كدا شوية ب شوية متابعة الـ E-Commerce عبـارة عن مكنـة فيها تروس كتيـر لو ترس فيه مشكله في المكنة دي كلها هتلاقيها دايما بتعطل عشـان كدا لما دايما ببص على أي بيزنس ببقا عايز أشوف كـل حاجة من أول تسـعير المنتج لـ رد الموديريشن على العميل في الرسايل ده اول بوسـت ليه علاقة بالـ Case دي وبإذن الله يكـون فيه كـام بوست كمـان اشرحلكم باقي الـ Case وندخل أكتر في مشاكل الـ Ads وايه الحاجات اللي نفعت بشـكل اكبر بحيث تكون باصص على كل حاجة لعله يفيدك بشكـل احسن