شركة واحدة من أصل 100 شركة هي اللي بتكمل
الكـلام ده متقالش ومش هتسمعه كتير
بداية وقبل اي حاجة صل على النبي وركز معايا شوية
الفـترة اللي فاتت ناس كتير جدا كـانت عايزة تخش مجـال الـ E-Commerce
اي حد فعليا عنده منتج او حتى مش عنده ولسا هيصنع بقا كل تفكيره انه هيعمل بيدج اونلاين ويبدأ يبيع عليها
خليني اقولك ان 99% من النـاس اللي بتبدأ في مجال الـ E-Commerce بتقفل ومش بتكمل شغل بعد اول 3 شهور ( ده في حال انهم كملوا الـ 3 شهور من الأساس )
طيب ايه الأسباب اللي بتخلي الشركة تقفل ؟
أولا : سوء التخطيط
أغلب الناس اللي بتتجه للـ E-Commerce بتروحله عشان فاكره ان ده اللي هيجيبلهم مكسب سريع وكمان هيقدروا يبيعوا كتير وبمصاريف قليلة وده طبعا مفهوم غلط
فـ بيبدأ يحسبها انا هصنع المنتج ده بـ 10ج وابيعه بـ 20ج وابقا كدا كسـبان 10ج في كل قطعة واتفق مع شركة شحن توصلي الأوردرات وأحط مصاريف الشحن على الأوردر اللي هبيعه وشكرا
ولو بيعت 100 أوردر ف انا كدا هكسب 1000ج وشكرا
ولما بيبأ يتصدم بالواقع وان كل الحسابات اللي حاسبها دي ملهاش علاقة باللي موجود في السوق والوضع بيحتاج منه تخطيط كتير وعمالة شغالة وناس فاهمة الحته دي وبتعرف تشتغل فيها بيبدأ يعيد هيكلة الدنيا تاني ف بيكتشف انه مش هيكسب غير 10ج مثلا اول فترة او احتمال حتى ميكسبهاش فـ بالتالي بيقول لأ شكرا انا مش هكمل ويوقف شغل
ثانيا : الأعتماد على الـ Direct Selling بس
واحدة من الأخطاء الشائعة اللي ممكن تحصل وبتبقا سبب أساسي في ان الشركة متكملش هي انها تكون معتمدة على الـ Direct sales بس ومش مهتمة بالعميل ولا هو عايز ايه ولا عندها نيه من الأساس ان العميل ده يرجعلها يشتري منها تاني
المـوضوع ده بيخلي الـ Project قائم بس على الأعلانات اللي بتتعمل ولو في يوم حصل والأعلانات دي وقفت مش بيكون فيه مبيعة واحدة بتتعمل فـ بالتالي ده بيخسر البيزنس كتير جدا
ثالثا : عـدم التأقلم مع ظروف السوق
ويمكن دي من أكتر الحاجات اللي باينة الفترة دي وبنشوفها بعنينا وهي ان الشخص لما يفتح بيزنس ويلاقي الخامات بتغلى عليه والمبيعات في ايام بتريح وايام تانية بتبقا كويسة هو مش بيعرف يتأقلم معاها ولو معندوش أفكار تطلعه من الظروف اللي بيمر بيها السوق ده مش بيعرف يكمل
رابعا : عدم وجود كفاءات يعتمد عليها
لو لسا بتفتح بيزنس وفاكر انك هتقدر تعمل كل حاجة من غير ما تستعين بحد خبرة في كل حته في الشغل فـ اعرف انك مش هتكمل اسبوع واحد في السوق وده ليه بقا
لأن مفيش حد فاهم كل حاجة انت كدا كدا هتحتاج ناس تشتغل معاك وهتحتاج كفاءات قادرة انها تطلع بالشغل بتاعك لقدام فـ فكرة انك تعمل كل حاجة وتقول انك هتعمل اعلانات وتصنع المنتجات وتصور وتكتب والخ الخ هتلاقي نفسك بتقع من غير ما تحس ومش هتلاقي اي تقدم في اي حاجة انت بتعملها
خامسا : منتجات سيئة
بص بقا يا سيدي انا معنديش مشكلة انك تجيب منك او تصنعه او غيرها بس الغلطة اللي هتعملها فعلا وتأثر في البيزنس بتاعك هي ان المنتج بتاعك ميكونش كويس ويكون فيه مشاكل والعملاء كلهم بيشتكوا منهم
اولا ده حرام خصوصا لو بتبيع حاجة انها خامة معينة او مواصفات معينة وبتروح للعميل انها حاجة تانية لأن ده غش تجاري صريح
وثانيا عمر العملاء دي ما هتكمل معاك ولا هتشتري منك تاني وهيبوظللك صفحتك بقا ريفيوهات وغيرها….
دي ملخص لأغلب المشاكل اللي هتحصلك وانت بتفتح بيزنس جديد وبنسبة كبيرة ده اللي موجود في الواقع وبيحصل كل يوم
وحلولها هي انك تعرفها وتفهمها كويس وتعمل عكسها
وأخيرا وليس أخرا ف البوست ده بناءا على تجارب شخصية بحته مش أكتر من كدا
والمعلومات اللي هنا كلها خالصة لوجه الله
فـ لو وصلت هنا ومحتاج مساعدة في اي حاجة وانا أقدر أقدمهالك ممكن تكلمني اي وقت ومتنساش دعوة حلوة لو استفدت مني بأي حاجة