ايه هو الـ CR هو conversion rate او معدل التحويل
انت بيدخلك كام واحد الويب سايت وبيشتري منهم كام واحد والنسبة بينهم دي اسمها الـ CR
طيب ده هيفيدنا في ايه ؟
احنا في الأعلانات بنتحاسب على حاجة لطيفة اوي الا وهي الـ ” Reach “
والسؤال المنطقي هنا :
يعني انا بتحاسب على عدد الناس مش على الـ Objective بتاع الكامبين ؟
الجواب بقا :
اه يا حبيب قلبي انت بتتحاسب على الـ REACH بس خد بالك الـ objective بتاع الكامبين ذات نفسها بيفرق في الـ Audiences وده معناه انك لو عـامل كـامبين الـ Objective بتاعها رسايل هتوصل لناس غير لما تكون عامل كامبين الـ Objective بتاعها Awareness وطبعا سعر الـ Reach هنا غير سعر الـ Reach هنا
تعالى اديلك مثال
انت دخلت عملت اعلانك الجميل بـ Messages objective والأعلان لقيته صرف 1000ج ومجبش وحتى رسالة
هل الفيس مش هياخد الـ 1000ج عشان حضرتك مجبتش رسايل ؟
لأ طبعا.
الفيس حاسبك على الناس اللي انت وصلتلها بالـ 1000ج دي ومش هامهه بقا هما عملوا Action على الـ ad بتاعك اصلا او لأ
طب احنا كدا عرفنا الفيس بيحاسبنا على ايه
الـ CR ماله بقا
تعالى نكمل المثال
انت بالـ 1000ج دول وصلت لـ 10الاف واحد
الـ 10 الاف دول منهم 1000 دخلوا الموقع
والـ 1000 دول في منهم بس 100 اشتروا
ف حضرتك كدا لو جيت بصيت هتلاقي المحصلة
انك عندك 100 اشتروا وتكلفة المبيعة واقف عليك بـ 100ج
اللي هي من الأخر حاصل قسمة اللي انت صرفته على عدد الناس اللي اشتروا
كلام جميل فين برضوا الـ Conversion rate في القصة دي
بص يا سيدي الـ 100 اللي اشتروا دول انت هتقسمهم على الـ 1000 اللي دخلوا الموقع في الأساس
هيديك نسبة تانية اللي هي الـ CR
ومعدل التحويل عندك هتلاقيه 10%
يعني نسبة الـ CR 10%
يعني لو داخلك 2000 واحد 200 واحد هيشتروا
هتلاقي النسبة برضوا 10% لأنها حاصل قسمة الـلي دخل على اللي اشترى
حلو اوي اوي
خليني اوضحلك الموضوع بقا
الـ CR مش حاجة ثابتة ومش محطوطله قواعد معينة بيمشي عليها او اقدر اقول اني هعمل 1 و 2 و 3 صح وهجيب CR أعلى وكدا
ولكن في حاجات كتير بتأثر عليه ولازم عشان اعرف اوصل للـ Max CR للـ Product اللي بشتغل عليه اعمل ( CRO )
او بالعربي لازم اشوف الحاجات اللي بتأثر على الـ CR وابدأ اعدلها عشان اوصل ل نسبة كويسة
ايه اللي بيأثر بقا على الـ CR ده
1- المنتج
طبعا انا بالنسبة ليك دلوقتي حاشر المنتج في كل حاجة في الحياة واي بوست بكتبه بجيب سيرته بس كدا كدا لازم اول حاجة تفكر فيها في حياتك هي المنتج ده لأن هو اصلا لو كويس هتلاقي الـ CR بتاعك عالي لوحده من غير ما تحاول تعمله Optimization حتى
2- الـسعر
السعر بيأثر ؟ ده مش بيأثر بس ده عامل اساسي في الـ CR وكالعادة خليني اقولك جرب انت وهات منتجين واحد سعره 100ج والتاني سعره 1000 ج وشوف مين اللي الـ CR هيكون أعلى وهتلاقي ان اللي بـ 100 ج أعلى بكتير جداا
طب ده معناه اني اقلل الأسعار عشان ابيع كتير ؟
لا ده معناه انك تروح تبص على بوست التسعير اللي انا كنت كاتبه
3- الـ Product page
يعني العميل اول ما بيخش موقعك الجميل بيبص على صفحة المنتج ويقرأ مواصفاته لو عجبته هيكمل معجبتوش هيطلع المفروض بقا انك متسيبوش يطلع من صفحة المنتج اصلا
اللعب في الـ Product page ليه مدارس كتير وعشان تفهم اكتر ابحث في اليوتيوب ب ” product page optimization “
وشوف كمية الفيديوهات على الموضوع ده عاملة ازاي وابقى ادعيلي
4- الـ Funnel
يعني انت دلوقتي لو دخلت اي موقع ولقيته بعد ما دوست add to cart دخلك على صفحة بتضيف فيها اسمك وايميلك وبعدين تدوس Next ف يدخلك على صفحة تانية تضيف فيها عنوانك ورقمك وبعدين صفحة تالتة تحدد فيها لون المنتج وصفحة رابعة فيها مواعيد التوصيل
انت اصلا هتزهق وتطلع ومش هتكمل فـ كل ما كان العميل رحلته في انه يعمل Checkout اسرع كل ما ده انعكس على الـ CR بتاعك
5- سرعة الموقع
من اهم الحاجات اللي بتأثر على الـ CR هي سرعة الموقع بتاعك وقيس الموضوع على نفسك انت لو داخل موقع ولقيته بيحمل ببطئ هتزهق وهتقوم جي طالع ومريح دماغك لكن لو داخل اي موقع ولقيته سريع وسهل في التعامل هتكمل عليه وممكن تقضي عليه وقت طويل عادي مش هتفرق معاك
خلاص كدا
هو للأسف مش خلاص بس دول تقريبا من أهم الحاجات اللي ممكن تفيدك ولو تابعتها هتقدر تظبط موضوع الـ CR
البوست الجي ان شاء الله هيبقا تجربة حصلت معانا في الشغل والحمدلله طريقة اتجربت وظبطت الـ CR بشكل كبير جدا 