بسم الله الرحمن الرحيم وبه نستعين والصلاة والسلام على رسول الله
اتكلمنا في الجزء الأول من الأسئلة الوجودية عن اسئلة بيسألها الناس اللي لسا بتبدي في المجال او اللي ابتدى قريب وللأسف ملهاش إجابة واضحة
خليني اوضحلك أكتر قصدي ايه
لازم اي سؤال تسأله يكون ليه عوامل أخرى وحاجات بيترتب عليها السؤال بتاعك ده وعلى أساسه هتلاقي الإجابة اللي انت عايزها
فـ لو سألت سؤال مجرد من غير ما تقول العوامل اللي حوالين السؤال ده مش هتلاقي إجابة واضحة
وقولنا جزء من الأسئلة دي في الجزء الأول
تعالى بقا نكمل هنا
اول سؤال : ايه أفضل منصة دروب شيبينج اشتغل عليها
خليني اجاوبك على السؤال ده بعد تجربة مش قليلة على منصات كتير في السوق الأجنبي منها والعربي وأقولك ان الموضوع ده بيعتمد عليك انت مش على المنصة ذات نفسها
أغلب المنصات الموجودة بيكون عندها منتجات متشابهه كتير بس الـ Rules بتاعت كل منصة مختلفة
سواء بقا في الشحن والتسليم او فترة العمولات او حتى مكالماتهم اللي بيأكدوا بيها للعميل
فـ لو انت بتفكر في منصة معينة أحب أقولك شوف أراء الناس فيها الأول ومشكلاتهم اللي بيواجهوها واعرف انت هتقابل التحديات دي ازاي وهل في حاجات سهل تعديها وحاجات تانية مش هتعرف تعديها ولا لأ
فـ السؤال ده ليه عوامل كتير جدا ممكن تسألهم ل نفسك الأول وبعدين تبدأ تتوكل على الله وتاخد الخطوة في انك تبدأ
تاني سؤال : شوبيفاي ولا ووكومرس ولا ماجينتو ولا اوبن كارت ولا يوكان
بص يا صديقي أختيارك للـبلاتفورم اللي هيقوم عليها شغلك كله ده حاجة الناس متقدرش تحددها
يعني انا مقدرش اقولك انا بستخدم ووكومرس مثلا ف انت تروح تستخدمه لأن ممكن يكون شغلك بسيط ويوكان يسهل عليك الدنيا من غير ما تحتاج مبرمج او بلاجنز زيادة
متشوفش حد بيستخدم شوبيفاي وتقول حلو ده انا هروح استخدمه عشان سهل من غير ما تعرف ايه الحاجات اللي ممكن تعطلك فيه
ف الإجابة على السؤال ده واقفة عليك برضوا ومدى المامك بالحاجات اللي انت محتاجها للبيزنس بتاعك والموارد المادية اللي هتستخدمها للسيستم اللي هتعمله
حط الأول البيزنس بتاعك قدامك وشوف انت محتاج ايه وبعدين ابدأ اتحرك على الأساس ده ولو أحتجت حاجة معينة جوا اي بلاتفورم تقدر تسأل عليها حد شغال على نفس البلاتفورم لكن متستخدمش حاجة حد بيستخدمها عشان شايفه بيستخدمها وخلاص
تالت سؤال : اذاكر ايه عشان اتعلم المجال
السـؤال ده تقريبا أكتر سؤال بتسأله وانا معنديش لوم على الناس اللي بتسأله لأ عادي جدا انك تسأله بس اعرف الأول ان السؤال بدايته كدا غلط
قبل ما تسأل تتعلم ايه لازم تعرف انت واقف فين الأول وذاكرت لحد فين وبعدين تسأل المفروض تذاكر منين او تتعلم ايه
يمكن دايما بقولها لنفسي قبل اي حد لازم تحط Roadmap للمذاكرة بتاعتك وتعرف انت عايز توصل ل فين عشان تبقا عارف خطواتك الجاية هتبقا عاملة ازاي
ولو داخل تسأل حد اذاكر ايه حاول دايما تقوله انت واصل ل فين بشغلك او بالمذاكرة بتاعتك وهو يقولك ممكن تذاكر ايه بعدها
رابع واخر سؤال : هي نسبة تسلمياتي المفروض تبقا كام ؟
ده السؤال اللي حرفيا ملوش إجابة
نسبة التسليمات بتاعتك مينفعش تسأل عليها حد لأن هي ليها عوامل كتير جدا زي
– نوع المنتج
– الفئة المستهدفة
– السوق اللي شغال فيه
– الـ Quality بتاع المنتج
– طريقة التأكيدات
عارف بقا لما تلم كل الحاجات دي وتشتغل عليها ايا كان نسبة التسليمات عندك كام انت هتعرف تعدلها للأحسن ان شاء الله
فـ متسألش المفروض نسبة تسليماتي تكون كام
اسأل أحسن نسبة تسليماتي ازاي
وأخيرا وليس اخرا
فـ البوست ده بناءا على التجربة ومش أكتر من كدا