البوست ده مهم لو ناوي تفتح في سوق جديد ( الجزء التاني )
بسم الله الرحمن الرحيم والصلاة والسلام على رسول الله
أتكلمنا البوست اللي فات عن الأوضاع القانونية اللي لازم تعرفها وانت داخل بلد جديدة والـ Market Test
ودي تقريبا كانوا اول حاجتين لازم تعرفهم وانت داخل سوق جديد
أول حاجة هتفكر فيها لما تدخل بلد جديدة هي انك هتظبط الـ E-Commerce Eco System ازاي !
– هتشحن مع مناديب ولا مع شركة شحن هتكلم العملاء فون ولا واتس اب هتتصرف ازاي في الـ Stock لو فضل عندك فترة
كل دي اسئلة لازم تسألها ل نفسك وتدورلها على حلول قبل ما تبدأ اي حاجة وخليني افكر معاك شوية فيهم بقا في البوست ده
البوست ده هنتكلم عن عامل من العـوامل الأساسية في الـ E-Commerce Eco System
الا وهو الـ Operation
مصطلح Operation ممكن يتحط لـ حاجات كتير اوي جوا الـ Cycle ولكن خلينا نتكلم عن اول جزء وهو الـ
Customer Services
انت داخل بلد جديدة فـ هتتكلم مع أهلها بالطريقة الـصح
خليني اديلك مثال لو داخل بلد أهلها مش بيحبوا يتكلموا في الموبايلات وشغالين على الواتس اب بس فـ طبيعي انت مش هتروح تأكد اوردراتك بالتليفون والا كدا هتكون بترخم على العميل وهو اصلا مش هيديلك مساحة انك ترد عليه
فـ لازم تكون عـارف البلد اللي انت داخلها دي بيستعملوا ايه كـ وسيلة تواصل وهما بيفضلوا يأكدوا أوردراتهم ازاي
كمـان الوقت اللي بتكلم فيه العميل ده مهم جدا واهم حاجة هنا انك تراعي فروق التوقيت يعني انت لو شغال في مصر والسوق اللي شغال فيه سعودي ف لازم تعرف ان فيه فرق توقيت ف مش هتتصل بالعميل بليل خالص يكون هو اصلا نايم او تتصل بيه قبل م هو يصحى
طيب انت لو شغال في بلد أغلبها بيتكلموا لغات مختلفة مش عربي بس فـ هضطر يكون عندك ناس لغات بيقدروا يتواصلوا مع العـملاء ( ومش بيستخدموا جوجل ترانسليشن )
طيب انت ظبطت كل ده المـفروض تعمل ايه بعد كدا وازاي هتطلع مكالمات
لو انت معندكش Call Center System تقدر تطلع بيه مكالمات برة مصر ممكـن تدور على شركة بتقدم الـ Services دي
ودول موجودين كتير
بس خد بالك انت مش هتقدر تقيس الـ Quality بتاعهم قد ما يكون عندك Internal Team معاك عشان تقيس الـ Quality بتاعه وتحاسبه عليه
وكدا نبقا اتكلمنا في اول جزء في الـ Operation Cycle بشكل مبسط ومن غير ما ندخل في كـل التفاصيل ولو محتاج برضوا اي حاجة ممكن تكلمني وبإذن الله اقدر اساعدك
الـ Logistics أو بالعربي الشحن والتحصيل من العملاء
بص بقا في شوية حاجات لازم تكون واخد بالك منها في موضوع الشحن ده
على أعتبار انك بدأت دلوقتي ف انت قدامك حلين اما انك يكون عندك Warehouse بتاعك وفيه ناس شغالة وشركة الشحـن بتعمل منه Pickup او انك تـكون مشترك في Fulfillment Center وهو بيقوم بأعمال التخزين والشحـن
كـل حل من دول زي ما ليه عيوب ليه مميزات كتير
خلينا نتكلم عن أول حاجة وهو انك واخد Warehouse بتطلع منه البضاعة
الحل ده انت كدا كدا هتعمله حتى لو بدأت مع Fulfillment Center يعني هي خطوة لازم تاخدها ولكن لازم تكون عارف انها هتكلفك حاجات زي الأيجارات وأجور العمال وغيرها وضيف على كدا انك مش ضامن تلاقي مخزن مساحته كويسه تقدر تخزن في البضاعة وكمـان لازم يكون في منطقة قريبة من نقط فرز شركات الشحن عشان الأوردر بتاعك ميتأخرش في انه يوصل ويفضل يتنطط من مكان ل مكان
طيب الـ Fulfillment Center بيزنس جميل اوي وبيوفر عليك حاجات كتير وممكـن يشيل من عليك هم الـ Logistics كله ولكن خد بالك لأن اوقات التكلفة بتبقا عليه مقارنة بأنك لو خدت مكـان ليك انت وخد بالك كل ما زاد حجم المنتج بتاعك زادت التكلفة لأن أغلب الـ Fulfillment Centers بيتكلموا بالمساحة اللي هتاخدها الشحنة طول وعرض وارتفاع
أوقات بيكونوا متعاقدين مع شركات شحن بيوصلوا من خلالها اوردراتك واوقات تانية بيبقا الـ Fulfillment هو نفسه شركة الشحن اللي بتوصلك الأوردرات
طيب تعالى بقا ندخل بقا في جزئية شركة الشحن ذات نفسها
اولا : شركات الشحـن بتحب دايما تشوف حجم أوردرات كبير ف لو داخل بعدد أوردرات صغير اعرف انك هتاخد اوفر اوحش من واحد رايح يشحن شحنه وخلاص
ثانيا : متاخدش ترشيحات ل شركات الشحن
يعني مش اي حد يقولك انا شغال مع ” س ” والشركة دي كويسة تروح تشحن معاهم وانت مسلمهم كل حاجة
لأنهم ممكن يكونوا معاه شغالين كويس ومعاك انت مش كويسين
فـ انت دايما دور على الأنسب ليك انت واللي هيخدم البيزنس بتاعك متفكرش في انه نفع مع حد تاني ف لازم يبقا كويس معاك
ثالثا : خلي عندك دايما Plan B لـ شركة الشحن يعني خد أكتر من Offer عشان لما تحتاج تغير الشركة في اي وقت تعرف تتحرك متستناش تتفق مع شركة شحن تانية
رابعا : لازم تكـون متابع انت النسب والـ Updates بتاعت شركة الشحن او عندك حد متابعها عشان متجيش تبص على النسب تلاقيها وحشة وفي الأخر يطلع انهم بيدوك Fake Updates والعملاء عايزة تستلم
وب كدا نكون خلصنا البوست بتاع انهاردة واتكلمنا عن عـاملين من العوامل الأساسية في الـ E-Commerce Eco System
البوست الجي بإذن الله هنتكلم شوية بقا عن الـ Performance وازاي نقدر نحقق نتايج كويسة ونـ Optimize الـ Campaigns بتاعتنا بشكل صح