بسم الله الرحمن الرحيم والصلاة والسلام على رسول الله 
انهاردة ومع تطور العالم كل يوم بشكل كبير بقا كل النـاس بتفكر ازاي تبقا شغالة في وظيفة معينة
لكـن اللي مبصوش ليه انك كنت زمان شغال الوظيفة دي بس لكـن دلوقتي لازم تزود على مهارتك دي شوية حاجات عشان تقدر تبقا احسن وتلاقي شغل افضل
وكلامي انهاردة رايح للـ Media Buyers او الـ Performance Marketers
او زي ما تكون عايز تسميهم قول عادي
التسميه لوحدها مش فارقة اللي فـارق دلوقتي هو انا المفروض فعلا ابقا ايه ؟
عزيزي القارئ لو كنت جيت من 5 سنين كنت هقولك اه انت لازم تبقا بتعرف تعمل اعلانات كويس وبتعرف تعمل ريتارجتيج والخ الخ
لكـن مع التطور اللي حصل في 2025 للأتمته ودور الـ Advantage+ والـ Performance Max
خليني أقولك ان الدور بتاعك دلوقتي بقا بيتطلب مهارات ابداعية عالية جدا واللي بنطلق عليها الـ Creative Strategy
النجاح حاليا في جزء الـ Performance بقا 50% منه مهارات تقنيه و50% ذكاء ابداعي وعاطفي مع التركيز طبعا على جزء الـ Growth
طيب هو انا لازم ابقا ميديا باير وايه !؟
1- ميديا باير وكريتيف ستراتيجز
2- ميديا باير ومتخصص CRO
3- ميديا باير ومتخصص Analysis
4- ميديا باير ( عادي )
طب هل هما دول بس الحاجات اللي انا المفروض ابقا فيها ميديا باير وحاجة
– لأ
اللي بقوله هنا على سبيل الذكر وليس الحصر ولو عايز تحصر الموضوع ممكن تروح تدور اكتر
طيب هو انا اصلا عشان اكون Media Buyer لازم يكون معايا شهادة !؟
– لأ برضوا
حاليا الخبرة العمليه في السوق اهم من كل الشهادات ( ده مش معناه ان الشهادات مش مهمة )
لكن لما تدخل Interview دلوقتي هتتسأل في ايه ؟
هتتسأل مثالا
– ازاي بتتعامل مع الأعلانات
– ازاي بتحلل الحملات بتاعتك
– ازاي بتدير البيانات
– بتذاكر منين
– وغيرها من الأسئلة
لكن محدش هيقولك انت مخدتش الشهادة الفلانية ليه…
ولو بيهمك الشهادات اوي
فـ سهله
Udemy بتدي شهادات
Coursera بتدي شهادات
Hubspot بتدي شهادات
Facebook Blueprint بتدي شهادات برضوا
العبرة هنا زي ما قولتلك مش في عدد الشهادات اللي انت واخدها قد ما هي في قد ايه انت فاهم الشغل اللي انت داخله
طبعا ازود عليك في المهارات الـ Soft Skills بتاعك
يعني انا هبقا ميديا باير وحاجة وكمان يبقا عندي Soft Skills !
– اه لازم يبقا عندك كل ده عشان تقدر تنافس في سوق العمل ( بنفسك )
سوق العمل اصبح دلوقتي صعب والصعوبة بتاعته معدتش في ان الناس تبقا عارفه كام معلومة لأ
بقا اصحاب البيزنس مستنين الجوكر اللي مقطع الدنيا اللي هيدخل يجيب البيزنس ويخليه يكسب ملايين في اول شهر
فـ انت لو مش فاهم السوق بشكل كافي وعارف هتنافس فيه ازاي انسا اي كلام من اللي انا قولته ده
طب يا قنديل انا اتعلمت خلاص وعايز خبرة… والشركات مش عايزة تنزلي اخد خبرة لأنهم عايزين حد عنده خبرة يشتغل
– مش هخليك تلف كتير في الـ Loop دي وهقولك اني واحد من الناس اللي بدأت شغل بأي حاجة
واي حاجة دي حرفيا
من اول كوبونات ( سوق دوت كوم ) اللي كنت بجرب عليها الأعلانات وبجرب عليها ازاي اعمل محتوى حلو وتصميمات جميله تبيع
والفري لانسينج وموقع خمسات اللي خد من طاقتي ووقتي كتير
والتدريب في اماكن صغيرة ومن غير فلوس
كل ده عشان حاجة واحدة….
ابني Portfolio حتى لو مفيهوش مليون عميل ولا في Case Studies بمليارات
لكـن كان فيه معافره وشغل فعلا وتعب…
واظهر خبرتك لو فاهم… طول ما انت فاهم وشايف حد محتاج مساعده قوله عليها وهيجيلك حد يقولك انا حاسس انك فاهم م تيجي نشتغل مع بعض
لأن السوق فعلا محتاج ناس فاهمه ويمكن دول اقل ناس بنلاقيها.
الكام نصيحة دول بقا من جوا قلبي هختم بيه البوست عشان مطولش عليكم 
خليك شخص بسيط… مش لازم تقول انك اجمد واحد في الدنيا عشان مفيش حد فينا جامد
اكتب كلام حلو بيجيلك من أراء الناس على خبرتك وشغلك ولما شغفك يقل ارجع بص للكلام ده ( هتحتاجه والله اوي طول الرحلة )
ذاكر كل يوم ولو 10 دقايق… مبقولكش ذاكر ساعتين تلاته
لأ ذاكر 10 دقايق بس كل يوم وشوف دماغك هيجيلها افكار عامله ازاي
ابني علاقات ابني علاقات ابني علاقات
شارك نجاحاتك من غير تفاخر وافرح لما تلاقي حد ناجح متقولش ده كتير عليه حاول تبقا زيه واحسن منه كمان
ساعد الناس ساعد الناس ساعد الناس
وكالعادة
تتمسوا بالخير
شكرا