أسهـل طريقة تفهم بيها الـ Leadership.
بسم الله الرحمن الرحيم والصلاة والسلام على رسول الله
البوست ده ملخص لـ Leadership Session كـنت بتفرج عليها وأقدر أقول عليها من أهم الـ Sessions اللي إتفرجت عليها في الجزئية دي
تعالوا ندخل في الموضوع على طول…
عشـان نتكلم عن الـ Leadership لازم نحطه في إطار
وعشـان نحطه في إطار لازم نعرف ايه العالم اللي احنا هنبقا فيه Leaders
فـ احنا لقينا ان العالم اللي احنا فيه ده عالم متغير بشـدة او كمـا اطلقنا عليه مصطلح ( VUCA )
اختصار لـ 4 حاجات
– Volatility
– Uncertainly
– Complexity
– Ambiguity
إختصارا لـ 4 حاجات ده فـ هما بيتكلموا عن ان العالم فيه متغيرات كتـير بنمر بمر بيها كل يوم وتقعيدات بتحصل ومش بيكون ليها حل قصادنا بيكون الوضع اوقات كتير شديد التعقيد وبيشوبه حالة من الغموض
الـ VUCA World خلق تحديات جديدة للقادة وأصبح أكثر صعوبة لأي حـد بيشغل دور القيادة
فـ ده هيتطلب منا نوع قـيادة مكنش موجود قـبل كدا 
حسب تقسـيم Ron Heifetz فـ هو قسم القـيادة ل جزئين
Adaptive Leadership , Technical Leadership
والفـرق بينهم الأتي :
الـ Technical
نوع من القيادة بيكون القائد ليه عنده حل للمواقف
وبيشتغل على سيستم
بيتحرك من خلال هيكل واطار مسبق ومعروف
بيصدر اوامر لأن هو اللي عنده الخبرة الكاملة
الـ Adaptive Leadership
وده النوع اللي محتاجين نكون فيه دلوقتي
النوع ده بيتطلب حاجات تانية لأن الـ Leader فيه بيعيد تشـكيل الواقع
وبيكون متمسك ب غاية اساسية مبتتغيرش
ولازم يكون عنده هدوء اعصاب وثبات انفعالي عشان اللي بيحصل حواليه
لازم يكون عنده مبدأ انه يقول ” معــرفش “
أو كـما قال برضوا Ron Heifetz
We own collective responsibility for the global conditions that we impact and that impact us.
We will not make these changes based on authority-based leadership, but rather with each of us taking a leadership role.
نيجي بقا للـجزء اللي بنقع فيه هو
الـ Balcony and Dance 
وده مصطلح بيفرقلنا بين الـقائد اللي بيبص لـ كل حاجة جوا الشغل وبيعمل الحاجات بتفاصيلها بنفسه
وقائد تاني قاعد في برج بعـيد بيبص من البلكونة وعنده نظرة استراتيجية اكبر
وقولنا ان القـائد دلوقتي لازم يـكون بيعمل الأتنين ” بيقدر انه يبقا في البلكونة وبينزل يرقص مع الناس “
ولازم يوازن بين الأتنين
طيب لغايت هنا زي الفـل.
نيجي بقا لـجزء الوعي عند القائد
هنتكلم هنا عن مصطلح اسمه :
Above and below the line 
أول حاجة هسيبلكم فـيديو في الـ Comments تتفـرجوا عليه بيتكلم عن الجزئية دي.
مخنا دايما بيخلينا في وضعيه دفاع عن النفس
القـائد لازم يبقا Open وعنده أفكار وبيسمع الناس
ولازم يشتغل على نفسه عشان يقدر يوصل للمرحلة دي
ودايما خليك فاكر ” طول ما عندك وعي اكبر طول ما مسئوليتك كبرت وخياراتك كترت “
هتلاقي نفسـك في أوقات كتـير Above the line وقـادر تبدع وتسمع وتتكلم وأوقات تانية هتلاقي نفسك Below the line بس في الوقت ده حاول على قد ما تقـدر انك تحـارب عشان تطلع لـ فوق متفضلش تحت.
تعالى بقا نـعرف الـ Adaptive Leadership اللي أصلا بيدور حواليها الـبوست كله
ونـبدأ بالتـعريف بتاعها :
Adaptive Leadership is a Social Process that enables people to work together as a cohesive group to produce collective results
يعني : عمليه على مستوى المجموعة لمساعدة الناس في العمل على شكل متقارب ل تحقيق نتائج جماعية
عشـان نحقق العمل على المستوى الجماعي في موديل ممكن نمشي عليه اسمه DAC
اختصار لـ 3 حاجات
Direction
Alignment
Commitment
الـ 3 حاجات دول لو اتوفروا في أي شـركة او استخدموا في القـيادة هتلاقوا كـل الناس عـارفة هي ماشية بتعمل ايه والقائد قادر انه يدير النـاس اللي معاه ويحقق دوره القيادي في الشـغل
لازم نبص على اننا عندنا اتجاه واضح الناس كلها شايفاه
وهل احنا متوافقين احنا هنمشي كلنا ازاي
هل احنا ملتزمين عشان نعمل الحاجات دي او لأ
طيب انا دلوقتي هسأل نفسي انا لو مش عندي جزء من دول ايه هيحصل للـتيم بتاعي ؟
تعالى اديك 3 سيناريوهات هيحصلوا :
لو عندك الـ Direction و الـ Alignment ومعندكش الـ Commitment
فـ هتلاقي الناس بتوعد ومش بتوفي بالكلام ومفيش التزام لأن مفيش احساس بالمسئولية
لو عندك Direction و Commitment ومعندكش Alignment
فـ هتلاقي فيه Duplication للـ Efforts عشان مش متفقين مع بعض يا اما فيه Overlap او Gap
لو عـندك Commitment و Alignment ومعندكش Direction
فـ هتلاقينا بنتحرك بسـرعه ومش بنوصل لـ حاجة ولا عـارفين احنا بنوصل لـ ايه
لأن مفيش حاجة نوصلها اصلا
وزي ما center of creative leadership بيقولوا :
you can only make leadership happen with others
يعني انت مش هتـقدر تحقق الـ Model ده لوحدك ولـكن لازم الـ Team كله يبقا معاك فيه
ندخل في الجـانب العملي من الـ Leadership
بيبدأ عندنا بالـ Leadership Versatility وهنا بنتكلم حوالين ايه الأدوار اللي بيلعبها الـ Leader
– الـ Player
– الـ Coach
– الـ Manager
– الـ Leader
الهدف اننا نبقا عارفين احنا في اي جزء والمفـروض ايه بنعمله اكتر من ايه
الـ Player Role هو الـدور اللي المفروض الـ Leader يلعبه أقل ميلعبوش في كـل الأوقات
اه هيجيله وقت ويلعبه لـكن وقت تاني مش هينفع يلعبه
الـ Manager Role
هو اللي بيقيس البيرفورمانس وبيساعد على حل المشاكل وبيكنترول الشغل كله من بعـيد وبيقدر يدي Right Feedback
وده هينقلنا لـ أهم نقطة ( بالنسبة ليا ) في الـبوست ده
How yo give a right Feedback
واحدة من أهم الإستراتيجيات إستخداما للـموضوع ده هي ( SBI )
أختصارا لـ 3 كلمات
Situation
Behavior
Impact
في الأول هنوصف الحالة اللي اتعمل فيها الحاجة دي
وبعدين نوصف السـلوك من غير ما نطلع أحكام او افتراضات
وأخر حاجة تأثير السـلوك ده عليك
طيب انا دلوقتي لـو جيت أقول Feedback لـحد هل من الصـح اني أحكم عليه ؟
– لأ
طيب أفرق أزاي بين السلوك والحكم ؟
– خليك مفرق دايما بين السـلوك وهو اي حاجة بيقدر يسمعها المايك او تشوفها الكاميرا
لكـن الحكم هو ترجمتك للسلوك اللي شوفته
مثالا عشان الجزئية دي مهمة وممكن نناقشها في بـوست تاني
يا علي إحنا لما كـنا في الـميتينج إمبارح وانا بعرض الأرقام انت كـنت بتخبط بإيدك على الترابيزة وده أداني انطباع انك متضايق من طريقة العـرض
انت هنا عـرضت الموقف ( Situation )
وقولتله سلوكه كان ايه ( Behavior )
وقولتله انطباعك على السلوك ده ( Impact )
وهنا نـقدر نقول انك هتوصل لـ جزئية انك بتدي Feedback بشـكل كويس وإحترافي يقـدر الشخص انه يتحاور معاك فيه من غير ما تصـدر عليه حكم وتبدأ تسمع إعتراضات
الـ Coach Role
هـو شخص بيطور ويسمع ويفكر في اداء الـتيم اللي معاه
ومش بيــحل المشكلة لكـن هو بيوصل اللي قدامه لـ طرق الحل بنفسه
وهنا بنستخدم استراتيجة الـ ( GROW )
اختصارا لـ 4 كلمات
Goal
Reality
Options
Way Forward
يعني الأول بنحدد الـهدف اللي احنا بادئين عليه الـ Coaching من الأساس
وبـعدين بنبدأ نقـول الحقايق
ونبدأ نحط الإختيارات اللي قدامنا ( مش من وجهة نظرنا )
وأخر حاجة بنحط Steps نمشي عليه عشان نحقق الـ Goals
وأخيرا اصعب حاجة هتواجها في الـ Coaching هي انك متقترحش حلول
أخر حاجة معانا هي
الـ Role of leader
وخلي في دماغك ان الحاجة الوحيدة اللي بتحرك الـ Leader هي الهدف بتاعه
الـ Leader بيحط رؤية ودايركشن نمشي عليه وبيلهم كل اللي حواليه والتغيرات اللي بتحصل بيحاول يخليها اسهل
وطبعا بيستخدم الـحاجات اللي قولنا عليها ” DAC ” عشان يبقا محدد هو ناقصه ايه او التيم ناقصه ايه
هل هما فعلا ناقصهم يبقوا Alignment ولا ناقصهم الـ Direction ولا عايزين يلتزموا اكتر
يمكـن ده واحد من أطول الـبوستات اللي كتـبتها بس عـايز أقول ان كـل حرف في الـ Session ده أثر فيا بشـكل مختلف 
اتمنى يكـون التلخيص عجبكم ولو محتاجين تسألوا في حاجة انا معاكم
وأخيرًا وليس آخرًا
اللهم لك الفضل والحمد على ما علمتني وسبحانك اللهم وبحمدك، أشهد أن لا إله إلا أنت، أستغفرك وأتوب إليك 