يفيد بايه مفتاح العربيه مع حد مبيعرفش يسوق
بسم الله الرحمن الرحيم والصلاه والسلام على رسول الله
اللهم افتح علينا فتوح العارفين، وعلّمنا ما ينفعنا، وانفعنا بما علّمتنا، وزدنا علماً
مشكلة الـ MediaBuyers الفترة دي او يمكن بقالها فترة طويلة انهم دايما بيكونوا فاكرين الموضوع سهل…
ايه يعني هنروح نجيب منتج ونشتغل عليه ونجيب حد يرد ع المسدجات ونعمل موقع ونبيع ونعمل فلوس كتير!
في الحقيقة انت هتعمل.. بس مش فلوس
هتعمل خيبة كبيرة.
من السهل اوي ان اي حد يقول انا هفتح بيزنس الصبح ما انا كدا كدا معايا كل حاجة
وكل حاجة سهله
هي مش سهله ولا حاجة والناس اللي انت شغال معاها مش عاملينها بالساهل ولا جت معاهم بالحظ
وهنا انا مش جي اقولك اعمل دراسة للسوق الأول وافهم الجمهور وكل الكلام ده…
انا جي أتكلم عن ظاهره بعيشها واشوفها كل يوم خصوصا في مجال زي مجال الملابس…
لكلام والفيديوهات اللي زي ” افتح البراند بتاعك بـ 5000ج “
” ابدأ دلوقتي من غير فلوس “
هو اللي خلى الناس تفكر ان ايه ده ما هي سهلة ويلا نعملها
وقتها انت كل اللي بتفكر فيه الأتي :
هجيب منتج بـ 150ج
هبيع المنتج بـ 350ج
كدا يبقا انا كسبان 200ج
كوست الأعلانات بتاعي بعد التسليمات 100ج
يبقا انا كدا عندي صافي ربح 100ج
هسلم بقا 1000 اوردر ويكون معايا كدا 100 الف ج اخر الشهر ربح
الحسبه حلوة صح ؟
أغرتك ؟
ده كدا كدا
لكـن عارف اللي انت مش حاسبه هو ايه!
هي لما هي سهله كدا الناس كلها معملتهاش ليه ؟
خليني أقولك سببين
السبب الأول : ان مش كل الناس عندها الخبرة او المعرفة اللي تخليها تعمل كدا
السبب التاني : انها حسبتها عمرها ما كانت انت كسبت كام بس!
لكن انت صرفت ايه؟
وضحيت بأيه عشان تعمل كدا!
اقولك حاجة كمان على هامش الكلام
لو انت ميديا باير وشاطر اوي وعايز تعمل كل حاجة بيرفكت هتروح فعلا تعملها كدا ومش هتلاقي مبيعات وهتحبط ومش هتكمل.
انت معملتش مبيعات ليه؟
مش عشان انت مش شاطر او عشان انت وحش بس عشان انت قصاد نفسك عملت كل حاجة وبصيت قولت ايه ده هي صعبة كدا ؟
طب ما انا شغلي اسهل وبعمل فلوس اكتر من كل المواضيع اللي انا بعملها دي
هتبقا عامل زي اللي معاه المفتاح والعربية بس هو متعلمش سواقة!
ما انت لو كنت بتعرف تسوق كان زمانك دورت العربية ومشيت.. لكـن انت اصلا كل اللي معاه العربية..
الخبرة مش معاك!
التجربة مش معاك!
وخد بقا النصيحة مني… انت بتعمل كل ده عشان بس اتخلل جواك احساس الطمع!
في شعره صغيرة بين الطمع والطموح…
الطموح هو الرغبة في التطور والنمو وتحقيق الأهداف
الطموح مبني على العمل والصبر والتخطيط
دايما طموحك تبقى عايز تكبر من غير ما تأذي حد او تاخد حق مش حقك
الطموح في رضا نسبي حتى لو نفسك في اكتر
اما الطمع
فـ هو انك عايز كل حاجة لـنفسك حتى لو على حساب غيرك
ممكن يكون انانية او استعجال للنتايج بأي طريقة
الطماع عمره ما بيشبع حتى لو حقق كتير
الطموح دايما بيسعى للنجاح اما الطماع بيسعى للسيطرة
فـ لو انت فعلا نويت ك ميديا باير انك تكبر وتعمل البيزنس بتاعك
اسأل نفسك دلوقتي
هل انت جاهز تتعلم قبل ما تكب ؟
هل مستعد تغلط وتتعب وتخسر وتقوم تاني ؟
هل انت فعلا طموح ولا طماع مستعجل ؟
لأن السهل مش اللي بيكسب
اللي بيكسب هو اللي بيستمر حتى لما الدنيا تمطر عليه تحديات
ادرس نفسك قبل ما تدرس السوق
اطمح قبل ما تطمح
وفي الأخر…
الطموح هو اللي بيحركك
التجربة اللي هتعلمك
الصبر اللي هيكسبك
ومتنساش انت حتى لو معاك العربية… اتعلم سواقة وبعدين خبط براحتك
بس كدا