شـريان نجاح الـ E-Commerce
قبل اي حاجة صل ع النبي واعذروني لو البوست ده مفيهوش كلام كتير بس ادعولي دور البرد يخف بسرعة وارجع أرغي معاكم تاني
لو سألت اي حد شغال في الـ E-Commerce ايه أكتر العوائق اللي بتقابله في الشغل هيقولك والله انا عندي مشكلة في
تأكيدات الأوردرات مع العميل
متابعة شركات الشحن
خدمة العملاء بعد البيع
سرعة التوصيل للعميل
نسبة التسليمات
وغيرها من الحاجات اللي بتظهر بعد مرحلة ما العميل يسجل بياناته عندك
شوية الحاجات دي بنسميها في الـ E-Commerce الـ Operation Cycle ودي بتبقا عبارة عن سلسلة متصلة ببعضها بتبدي بتأكيد الأوردر مع العميل ومش بتنتهي لأ هي بتفضل مكملة معاك وهقولك ازاي كمان شوية
خليني اقولك ان الـ Operation Cycle دي بتكبر او بتصغر على حسب الـ Business Model بتاعك
يعني مش كل الـ E-Commerce Stores عندها نفس الـ Cycle
في ناس عندها الـ Cycle دي 4 خطوات مثلا
1- تأكيد الأوردر
2- الباكدجنج
3- تسليم ل شركة الشحن
4- متابعة الأوردر لحين وصوله للعميل
وفي ناس تانية الـ Cycle عندها أطول بكتير وبيبقا جواها عمليات تانية صغيرة ممكن متبانش لو الـ Model بتاعك لسا في البداية خصوصا لو بتطلع عدد أوردرات كبير
ملحوظه : لما عدد أوردراتك يكبر جدا هتلاقي نفسك بتضيف للـ Process دي حاجات تخليك تشوف كل الأخطاء من كل الناس اللي شغالة معاك بحيث لما حلقة واحدة تسقط تكون عارف الغلطة فين بالظبط
الـ Operation بحر كبير جدا ومليان متاهات وفيه Systems كبيرة بتتعمل مخصوص عشان تعرف كل حاجة بتتم جوا الـ Operation Cycle بتاعتك
طيب احنا عرفنا دلوقتي يعني ايه Operation Cycle عايزين بقا نعرف لو انا لسا ببتدي المفروض اكون منظم الجزء ده ازاي ؟
لو لسا بتبدي E-Commerce الدنيا عندك هتكون بسيطة بشكل كبير يعني انت عندك منتج – بتصنعه او بتشتريه من مورد – وبتخزنه عندك في قوضة او في مخزن ايا كان وبتبدأ تشوف شركة شحن كويسة تتعامل معاها وتتفق على عدد أوردرات تطلعه كل شهر وتبدأ تأكد اوردراتك وبتتابع نسب تسليمات شركة الشحن وتستسلم مرتجعاتك وبس
اولا : جهز Excel Sheet للأوردرات بتاعتك كلها ” ده في حال انك مش عندك ويب سايت “
الشيـت ده هيكون عليه الشخص اللي بيسجل الأوردرات اللي بتجيلك لو انت مشغل حد معاك موديريشن
واعمل في الشيت ده Check box لما الأوردر يتأكد علم عليه عشان تعرف انت بتأكد أوردرات قد ايه من الأوردرات اللي بتدخلك
ثانيا : هتبدأ تجهز أوردراتك ( المتأكدة ) وتحطها في فلايرات شركة الشحن وترفعها على السيستم بتاع الشركة وتطبع البوليصة بتاعتك وتحطها في الفلاير
ثالثا : هتطلع الأوردرات كلها مع المندوب اللي هيستلم منك الأوردرات دي وتبدأ تتابع المحاولات اللي بتتم عليها من سيستم شركة الشحن يوميا وتكلم العملاء اللي بيحصلها محاولات تسليم ومش بتستلم ” والموضوع ده ضروري جدا عشان في مناديب بتعمل ابديتس انها حاولت تسلم وتكلم العميل يقولك محدش كلمني “
رابعا : هتنزل شيت كل 3 ايام من شركة الشحن تشوف فيه الأوردرات اللي اتسلمت واللي متسلمتش وتقارنه دايما بالشيت بتاعك
خامسا : تعمل شيت صغير تتابع فيه الحسابات بتاعتك وده هيكون من أهم الشيتات لأنك لو محسبتش كل حاجة وعرفت انت سلمت ب كام ومكسبك فيهم كام ممكن تطلع أخر الشهر خسران وانت مش حاسس
الخطوات دي أبسط خطوات ممكن تتخيلها كـ Operation Cycle واعتقد انها مش صعبه خالص كـ تجهيز وكـ متابعة ولو في حاجة مش فاهمها او حاجة محتاج تفهمها اكتر ممكن تسألني وبإذن الله اجاوب عليك بكل اللي انت محتاجه
وأخيرا البوست ده المعلومات اللي فيه بناءا على التجربة وليس الا
ولو وصلت ل هنا ومحتاج اساعدك ف اي حاجة ف تقدر تبعتلي اي وقت ومتنساش تدعيلي دعوة حلوة بظهر الغيب.