اشتغل افيليت ولا لأ ؟!
الفتـرة اللي فاتت وطبعا على البوستات اللي كنت بكتبها كان بيكلمني ناس كتير شغالين افيليت على منصات كتير جوا مصر وبرة مصر
منهم اللي الدنيا معاه كويسة الى حد ما وناس تانية بتصرف كتير ومش عارفة هي بتكسب ولا مبتكسبش ولا حالتها ايه
وكان في سؤال بيتسأل في كل مكالمة الا وهو
” انزل اجيب المنتجات انا واشتغل واحدة واحدة بالسايكل كاملة ولا اكمل افيليت بس ؟ “
إجابة السؤال ده مش سهلة وعليها شوية اسئلة لازم تتسأل
– هل عارف المفروض السايكل بتاعت الأيكوميرس بتمشي ازاي ولا هتبدأ وتقعد تقع في الحاجات اللي الناس بتقع فيها اول ما تبدأ ؟
– انت اصلا اشتغلت السايكل كلها بإيدك قبل كدا ؟
– معـاك ميزانية كويسة تمشيك 3 شهور على الأقل من غير ما تكسب ؟
– عارف هتجيب المنتجات منين ؟
– بتعرف تتفق مع شركات الشحن وعـارف هتتابع اوردراتك معاهم ازاي ؟
– عارف هتسعر المنتجات ازاي وانت عندك مصاريف تانية هتظهر مش موجودة في الأفيليت ؟
– واسئلة كتير من نوعية هتيست على المنتج الأول ولا هتجيبه الأول وعـارف هتسايكل المنتجات ازاي لو في حاجة باقية عندك ومش عارف تطلعها ومحتاج تجيب منتجات زيادة والخ..
إجابتك للأسئلة دي هي اللي هتحدد اذا كنت قادر اصلا تبدأ لوحدك وتسيب الأفيليت ولا لأ
طب تعالى نوضح الأسئلة دي شوية لعلك تستفيد
– اول حاجة السـايكل بتاعت الأيكوميرس معناها العمليات اللي بتتم من اول ما بتشتري المنتج من المورد الى انك تطلع المنتج ده مع شركة الشحن وتستلم فلوسه
السايكل دي محتاجة حد اشتغل بإيده عشان ميقعش في غلطات اي حد بيبدأ وقع فيها
وقدامك حلين عشان تعرف الغلطات دي أغلبها ايه
– انك تسأل حد اشتغل ودايس في الموضوع بإيده
– انك تشتغل انت بإيدك مع حد شغال فترة وتتعلم انت
وفي بوست كــامل انا شارح في السايكل كلها From A TO Z ممكن تبص عليه ” هحط اللينك بتاعه في الكومنتات “
– تاني حاجة هي الميزانية
طول ما انت شغال افيليت ف انت عندك حاجتين اولهم فلوس الأعلانات بتاعتك وتاني حاجة المصاريف اللي انت بتصرفها ولازم تفضل تصرف منها الى ان يتصرفلك العمولة بتاعتك وتقدر بيها تعمل كاش فلو عشان تعرف الفلوس اللي داخلة واللي طالعة بتدخل وتطلع امتى وتبقا عامل حسابك على كل الظروف
وحط في دماغك انك لازم تكون حاطط فلوس على جنب متمدش ايدك عليهم غير لما تكون في اشد احتياج ليهم.
– تالت حاجة هتجيب المنتجات منين ويمكن دي من اسهل واصعب الحاجات
لأنك لو مش عارف هتجيب المنتجات اللي انت عايزها منين فـ هتقعد تلف كتير وهتجيب المنتجات بسعر غالي برضوا ولو حد تاني جايبها بسعر أقل هتلاقيه بيبيع بسعر أقل منك وانت مش عارف تشتغل
و Ayop Abdelrahman كـان كاتب بوست لطيف اوي متقسم فيه المنتجات اللي انت عايز تجيبها والأماكن اللي ممكن تجيبها منها كمان
– رابع حاجة الا وهي شركات الشحن ولاحظ ان دي البعبع اللي موقع ناس كتير اوي خصوصا لو بتبدي
شركات الشحن كتير لكن فكرة الأتفاق مع شركة الشحن ذات نفسها ده اللي ممكن يكون بالنسبة ليك قصة طويل
للأسف انا مقدرش ارشح شركة معينة في مصر لحد ولكن انت جرب اكتر من شركة واتفق على سعر كويس مناسب لعدد الأوردرات اللي انت بتطلعها
وشوف الشركة الكويسة معاك ك نسب تسليمات وكاش فلو وتعويضات وكل الحاجات دي
– خامس حاجة وعامل لا يقل اهمية عن كل العوامل اللي انا قولتها فوق دي وهو الـتسعير وانا من الناس اللي اتنبح صوتها في الموضوع ده وكتبت عنه اكتر من بوست وممكن اسيبلكم لينكاتهم في الكومنتات كمان
ولكن خد النصيحة دي ” لو مش حاسب تسعير صح مستحيل تكسب جنيه “
الأسئلة التانية بقا كتير وانا بصراحة مقدرش اخلص كل الأسئلة في بوست واحد ولكن لو عندك اي سؤال في الموضوع ده ممكن تبعتلي وانا اجاوبك ان شاء الله 
انا في البوست ده مش بقولك متشتغلش افيليت
لأ خالص في ناس شغالة افيليت ومقومة شركة كاملة على الموضوع ده ولكن انت اختار المناسب ليك وبس